2012-03-05

Heriotza zakarrontzian


HITZA: BELAZE

Azukrezko belardiak dira belazeak. Oinutsik dabiltzan arrasto babesgabeei gozotasun pixka bat oparitzen dieten izara garbitu berriak. Ukimena zentimetroka neurtzen duten zizare  sareak dira belazeak, oinpean atximur txikiak egiten dituzten ezpain bihurrien bizitoki. Itzal etzanen harrapatoki dira belazeak, argia izerdika-izerdika zupatzen duten igerileku berdeak.

Belazeetan ametsak etzan egiten dira, ilusio izpiak zutik ibil daitezen.


AFORISMOA: Bizirik hil beharra ere!

Bazen behin suari putz egin nahi ez, eta hatsari su ematen zion (bizilagun bat?). 

Mingaina kandela bihurtu zitzaion egun batean gauez bizitzen ikasi zuen. 

Hil egin zela errepikatzen zion behin eta bi aldiz bere buruari. Hil egin zela eta horregatik jarraitu nahi zuela bizirik.



HAIKUA:

Zakarrontzian
paperezko pilotak
esku pilotan


4 comentarios:

  1. Aforismo eta haikuetan, hitzekin bakarrik ez, irudiekin ere bete betean asmatzen dezu.Bloga bere osotasunean oso gustuko det, baina, atal honek, bereziki, asko erakartzen nau.

    ResponderEliminar
    Respuestas
    1. Ez da ba erraza izaten astelehen bezperatan buruari tira egitea! Baina, zure hitzen indarrak paper zuriaren aurrean beste behin jartzera bultzatzen nau! Eskerrik asko, Joseba!

      Eliminar
  2. Arrazoi dek Joseba, aforismoak, haikuak eta irudiek aste osorako arrastoa uzten ditek eta hurrengoak irakurtzeko irrika pizten.

    Portzierto, Irati, hilda bizitzeak ere ez du ederra izan behar, ez?

    Eutsi horri!

    ResponderEliminar
    Respuestas
    1. Ezin erantzun, Ekaitz! Ez nuke horri erantzuten jakin nahi!

      Eutsi zuk egiten nauzu!

      Eliminar