2015-12-10

Itaka_Jasone Osoro_2015-11-14


Hamabietan puntu-puntuan. Kanpaikada bakoitzeko astinaldi bat barrura, hamabietan puntuan, begirada bat, kolpetxo bat ipurdian, birikak betetze bat, hozkada bat mingainari. Hamabietan puntuan, atximur kontzientziari, betileak hutsunean, sua hozkailuan, isiltasun lerrokatua. Hori guztia hamabietan puntu-puntuan. Hasi eta eten; topa egiteko. 

Bermutaren garaia da esan zuen erlojugileak, eta tik-tak bakoitzeko azeituna hezur bat irensten saiatu zen. Eztarria itxita du ordutik, ahots oihartzuna pentsamenduarena da. 




Azaroaren 14an Jasone Osoro idazle elgoibartarrarekin aritu ginen solasean argitaratu berri duen "12etan bermuta" liburuaz. Bejondeizula, Jasone, liburu eder honengatik! Topa!

Ezkaratzean Irati Ricon beasaindar gaztea izan genuen. Bikaina idatzia, Irati!


2015-12-09

Zazpi ezberdintasunak

Txindoki_2015-12-5

1.- Goierriko eguzki uzkurtua, Erriberako eguzki hanpatua. 
2.- Goierriko urdin ilunkara, Erriberako urdin urdin urdina.
3.- Goierriko lainotzarrak, Erriberako laino aspaldi zahartuak.
4.- Goierriko harkaitz idorrak, Erriberako harkaitz bustiak.
5.- Goierriko gorputz saltaria, Erriberako gorputz uzkurra. 
6.- Goierriko argazkilaria, Erriberako argazkilaria. 
7.- Goierriko motots harrotua, Erriberako motots lotsatua. 


Moncayo_2015-12-6



2015-12-01

BIHURRIKERIAK

Santillana del Mar-en abuztuan Santio Bideko etapa amaieran
Inoiz kontatu izan dizkiet ume eta gaztetxoei ipuinak. Inoiz ausartu izan naiz irudimena errota lanetan jarri eta sinesten errazak ez diren hankaz gorako istorioak kontatzen; begiak betazaletan zintzilikatzen, mingaina ezpainei itsasten, eskuekin eguzkiak berotzen, eta lo hartu aurreko segundo horretan esnatzen. Ederra da gaztetxoenen jakin-mina eta inozentzia bihurrikeria bihurtzea. Ipuinak kontatzea hori baita, bihurrikeriatan aritzea.

            Ostegunean Ataungo Joxemiel Barandiaran Herri Eskolara joango gara Ekaitz anaia eta biok ipuinak kontatzera, eta egunotan hor nabil jolasa ezuste, ezustea sorpresa eta sorpresa jolas nola bihurtu asmatu nahian. Bihurrikeriak bururatzen zaizkit; bihurrikeriak umeentzat eta bihurrikeriak neure buruarentzat. 
       Ez zait gustatzen hiztegian bihurrikeriaz topatu dudan definizioa; gaiztakeria eta okerkeria aipatzen ditu. Nik buruan darabilkidan bihurrikeriak asmo txarrik gabeko jolasa du ardatz. Bihurrikeriak buruaren plazer direla uste dut.

         Bihurrikeriak egileak eta hartzaileak ditu. Egileak jakin-mina asetzea du helburu, hartzailearengan ezusteko erantzuna bilatzea.

       Konta nitzake besteen bihurrikeriak, baina, buruaren gozamen diren plazerak, gorputzarenak diren bezalaxe, norberak bizi eta sentitzekoak dira. Orain eta hemen bihurria izatea gustatuko litzaidake. Hartzailearen, hau da, soinu mahaian zauden horren ezustea neure egitea. Eta isilduko banintz? Ez dakit… zazpi-zortzi segundoz… Hitz egiteari utziko banio? Jakingo luke irratiak isiltasunaren pisuari desafio egiten?

            Haustea. Espero den egoera normal horrekin hausteak du xarma. 

            Mutu gelditu zen irratiarena. Argumentu polita izan daiteke ipuin baterako.


        Hurrengoan gehiago, bitartean izan bihurriak. Eta hautsi, ezer eta inor puskatzeko asmorik gabe, hautsi. 



2015-11-11

Itaka_Aitor Sarriegi eta Iñaki Apalategi_2015-10-24

Iñaki Apalategi eta Aitor Sarriegi Lazkao Txiki begira dutela



Urriaren 24an Aitor Sarriegi eta Iñaki Apalategirekin aritu ginen solasean. Besteak beste Gipuzkoako Bertsolari txapelketaz, baina, ez hortaz bakarrik. Mahaiaren bueltan bertsotan hastea bakarrik falta izan zitzaigun; horrek ez du esan nahi bertsoa falta izan zenik. 

Saioaren egunean final laurdenetan kantatzeke zegoen Iñaki, orain finalerdietan kantatuko duela badakigu. Zorionak eta zorte on!



2015-11-10

Azaroan uztaila

Hiru Erregeen Mahaina_2015-11-8

Bi ukabilak itxi eta esku gainaren eta hatzen arteko lotura diren hezurrei erreparatzen erakutsi ziguten umetan. Eskuaren kanpoko aldetik hasi eta 1urtarrilahezurra31egun, 2otsailazuloa31egunbainogutxiagoja, 3martxoahezurra31egun, 4apirilazuloa30egun... Hilabeteek zenbat egun dituzten jakiten genuen horrela.  Hilabete bakoitza urtean zehar non kokatuta dagoen irudikatzera ere iristen ginen. Ume izateari utzi diogun honetan (ja!) hilabeteak zenbat egun dituen asmatzen jarraitzen dugu; hilabeteak urtean zehar non kokatuta dauden, ordea, ez dago jakiterik. 


Hiru Erregeen Mahian_2015-11-8



2015-11-04

AKTITUDE KONTUA DA

Khurrame eta Irati Txindoki gainean
Pasa den igandean Txindokin izan nintzen, aitarekin, Khurramekin eta Wakarrekin.  Lagun handiak egin ditut azken hilabeteotan Khurram eta Wakar. Pakistandarrak dira. Hizketaldi sakonak izaten ditugu, tabu, muga eta zapirik gabeak. Urdua hitz egiten dute eta ingelesa. Gaztelania ere bai. Panjabia da euren ama hizkuntza. Bitxia da, baina, euskara ikasten hasi aurretik ikasi dute euskara erabiltzen.
Euskaraz agurtzen dugu beti elkar eta euskarazko hitz berri bat ikasita joaten dira beti etxera. Ikasi dute euskaraz irribarre egiten. Euskaraz egiten dute irribarre. Esango nuke jarrera kontua dela, eta nahiz eta aktitude hitzak euskara jatorretik askorik ez izan, gustatzen zait aktitude kontua dela esatea. Aktitude kontua da. Ingurua euskaraz gozatzen ikusten duenak, ingurua euskara goxatzen ikusten duenak euskara erabiltzen ikasten du.

Institutuko guraso elkartearen kezka da: ikasleek, hau da, euren seme-alabek, ez dute euskararik erabiltzen. Arlo akademiko oso hertsira mugatzen omen dute euskararen erabilera institutuetako ikasleek, hau da, gurasoen seme-alabek, hau da, udalerrietako herritarrek.
Euskaraz egiteaz gogoratzen ez den ikasleak, seme-alabak eta herritarrak euskararekiko aktitudea behar du bere baitan, baina, batez ere, euskararekiko aktitudeak behar ditu bere inguruan. Kezkatuta dagoen guraso horrek, izan euskaldun edo ez, badaki euskaraz irribarre egiten, badaki euskarazko animoak ematen eta batez ere badaki hain ezdeusak diruditen baina, hain garrantzitsuak diren keinu esanguratsu horiek euskaraz egiten. Aktitude kontua da.

Orain gutxi Iñaki Eizmendiri entzun diot irakasleak berritsua behar duela izan. Berritsu entzulea, hizketaldiak sortzen dituena, hizketarako uneak eta guneak errazten dituena, ikasgelan, pasabideetan, jangelan… Aktitude kontua da.

Euskaraz gozatzen dugunok euskararekin gozatzen dugula erakutsi behar dugu, hori ez baita ikusten ikusarazi ezean.


Bidea luzea da, Txindoki han dago, baina aktitudea, jarrera pauso bakoitzak indartzen du. Eta ederra da Txindoki gainera iritsi, elkarri eskerrak euskaraz eman eta Khurrami bizkarretik helduta argazkia ateratzea. Bat, bi eta klik. Ez dago zalantzarik. Irribarreak euskaldunak dira. Eskerrik asko, bikote. Shukriya.



Euskalerria irratiko atzoko irrintzian testua entzungai http://euskalerriairratia.eus/komunitatea/IratiGoikoetxea/1446741707540




2015-11-03

Itaka_Nahia Martinez_2015-10-17

Nahia Martinez kantuan Segura Irratian
Gaztea da, ilusioak gainezka egiten dion gaztea. Abestu egiten du, pianoa jotzen du eta sormenaren magiarekin jolasean ibiltzen da. EITB-ko Izarrak Kalean saioko finalera iritsi eta entzuleen saria irabazi zuen. Urriaren 17an irratian izan genuen zuzen-zuzenean kantari. Bere ahots ederraz gozatzeko aukera polita izan genuen. Eskerrik asko, Nahia!



Itakakideoi Nahiak egindako marrazkia:


Nahia Martinezek Itakarik eginiko oparia



2015-10-26

Itaka_Aritz Gorrotxategi_2015-10-10

Aritz Gorrotxategi "Koldar hutsa zara" liburuaren aurkezpenean
Izan daiteke beldurragatik, lotsagatik beharbada, minak ere izan dezake zerikusirik, edo nekeak, edo asperdurak. Batzuetan lo harrapatzen gaitu ezusteak, espero gabe esnatzen den egunak. "Itsasoa handiegia da" entzun nion behin bati ura poltsikoan sartzen zuen bitartean, ez nion galdetu ea zertan ari zen; ez nintzen ausartu. 

Izan daiteke ezjakintasunagatik, desorekengatik akaso, bustitzen ez duten izerdiek izan dezakete zerikusirik, edo nazka sentipenek, edo biluzik irudikatutako sabelek. "Egarria handiegia da" entzun nion behin bati pixa egiten zuen bitartean. Ez nion iradokitu bere pixa edan zezakeela... Zertarako, itsaso handi horretan dena bada pixaontzi? 

Izan daiteke auskalo zergatik, ez naiz esatera ausartzen. Koldarra naiz, edo ez. Ez naiz esatera ausartzen eta kitto. Koldarra naiz?





Aritz Gorrotxategirekin solasean aritu ginen urriaren 10ean Itaka saioan. "Koldar hutsa zara" (Erein) liburua aurkeztera etorri eta liburuaren aurkezpenaz harago asko da Aritzek oparitu ziguna. Begirada oparitu zigun eta biluztu egin zen. Biluztu egin gintuen. Ez dago gehiago ematerik. Ez dago gehiago eskatzerik. Eskerrik asko!


2015-10-19

Itaka_Idoia Granizo, Maddi Aiestaran eta Ekain Alegre_2015-10-3


Ekain, Irati, Maddi, Ekaitz eta Idoia Segura Irratian_2015-10-3





XXIV. Lazkao Txiki Bertsopaper lehiaketako sariak jaso berritan egin zigun bisita hirukoteak. Gazteen mailako hiru sariak jaso dituzte Idoia Granizo, Maddi Aiestaran eta Ekain Alegrek hurrenez hurren. Altsasuarrak dira lehenengoa eta hirugarrena, beasaindarra da bigarrena. Ilusioz heltzen diote sormen lanari eta ederrak dira emaitzak, bikainak. Hizketarako gaitasun aparta dute. Ederki pasa genuen irratian, ederki pasarazten digute etortzen diren aldiro. Eta gainera ikasi egiten dugu. Batez ere ikasi egiten dugu; eurengandik ere bai. 

Zorionak, hirukote!


2015-09-30

Itaka_Agurtzane eta Ion Elustondo_2015-9-26

Diskoaren azala



Elkarri begira, elkarren begietan, elkarrenganako miraz, elkarrekin solasean, elkartuz musika, elkarrentzako sortuz, elkarrengana iritsi. Urte luzetako lanaren ispiluetako bat da orain gutxi plazaratu duten diska. Beraiek ardatz nagusi izanik, asko eta aberatsak dira inguruan izan dituzten kolaboratzaileak, bai letra egileak, baita musikariak ere. 14 kantuko sorta ederra sortu dute, hara-honako joan-etorrietan gustura entzuten duguna. 

Larunbatean elkarrekin aritu ginen solasean irratian. Ederki pasa genuen! Eskerrik asko, bikote!


2015-09-21

FRIKIPEDIA



Eskerrik asko, Noel. Bizitza hari bat da. Tira, pentsatu nahi dut bizitza izan izan ez dela ezer, guk egiten dugula halakoa edo horrelakoa. Bizitza hari bihurtzen dugu, baldin eta berau korapilatzeko beldurrik ez badugu, noski. Bizitzak korapilatu egiten gaitu. Tira, pentsatu nahi dut bizitzak egin egin ez duela ezer egiten, gu garela hau edo bestea egin eta hau edo bestea eragiten dugunak, baldin eta geure burua korapilatzeko beldurrik ez badugu, noski.

Bururatu eta brausta ahoratu, ahoratu eta brausta kanporatu (gogoratu "Andraizea": ez mutilatu burutik ahora bidean ideiarik, ahotik kanpora bidean hitzik). Zenbaki arruntak eta osoak, arrazionalak eta irrazionalak, errealak eta... eta... eta besterik? Bururatu bazitzaidan bururatu zitzaidan eta besterik? galdetzea. Galdera bigarrenez errepikatzerako Noelek eskua altxatua (barka, luzatua) zuen eta ez bat eta ez bi erantzuteko aukera eman nion, gustura gainera! Zenbaki irrealak berak. Barka, zenbaki irrealak! berak. Erantzuten jakin egin behar baita, emozioz, indartsu eta seguru. Zenbaki irrealak! esan zuen Noelek. Zenbaki irrealak, Irati, helduion horri, txikita! (hori neuk neurekiko). Adierazi nahi zuenaren benetako (zer ote da benetakoa, Irati!) hitza hurrengo saioarako ekartzeko eskatu nion. 

Kontua da "zenbaki irrealak" hartatik zintzilik gelditu nintzela ni jakin-minez. Eta ez bat eta ez bi, klaseak bukatu orduko Internet maitera jo nuela. Bilatzailean zenbaki irrealak jarri eta to, oparia. Nik gelari galdera, Noelek niri erantzuna, Noelek niri amua, nik neure buruari jakin-mina, jakin-minak niri Internet, Internet guztiz ahaldunak (?¿) niri oparia: FRIKIPEDIA. Hala ezagutu dut txokoa. Korapiloa hari bihurtuta. Noeli eskerrak. Zenbaki irudikari uste nituen zenbaki irrealei eskerrak. Noel, mila esker.


2015-09-16

PANPINAK


Betidanik gustatu izan zaizkit panpinak. Umetan ohe gainean jartzen nituen Nenuca eta Nenucoak, etxera auskalo nondik, auskalo nola (etxean beti izan gara jostailuarropaeskolamaterialak berrerabiltzekoak) iritsitako azal beltx, gorri, hori, urdin eta berdeko panpinak. Barbirik ez dut izan sekula.

Ohe gainean jartzen nituen eskolan baleude bezala. Eta ni irakasle lanetan. Izango nituen bost edo zazpi urte, bederatzi akaso. Bitxia da; matematika irakasten nien. Bost-sei panpina izaten nituen ohe gainean isil-isilik, bare-bare, zintzo-zintzo.

Iraila aspalditxo hasi genuen arren, atzo eman nion ikasgela barruko lanari hasiera. Ikasturte berria. Lanera gonbidatu nituen ikasleak aurkezpen hitzetan, ahalegintzera, saiatzearen plazera sentitzera, irribarre egitera, entretenitzera, nekatzera, ikaskideak eta irakaslea zirikatzera, hausnarketei tira egitera, eskua luzatu (ez altxa) eta galdetzera, parte hartzera, galdetzera, euren burua desorekatzera, zoriontsu izatera, jakin mina zalantzaz janztera, erantzunetan erortzera eta lagunari altxatzen laguntzera. Eta noski, hori guztia ezin da isil-isilik egin, bare-bare, zintzo-zintzo. Mezua ulertu duenak ikasiko du gehien; mezua ulertu duenak gozatuko du gehien: ikasgelan ez dut panpinarik nahi. 


2015-09-10

Ekaitz Goikoetxea_ITAKA_2015-9-5

Ekaitz Goikoetxea Laredon_2015-8-9





Aurkezpena egin beharko nioke eta papera zuri. 

Aurkezpena egin beharko nioke eta hitzak mutu. 

Ez zait besterik bururatzen, begietara begiratu nahi diot eta esan: Ekaitz, izugarri maitte zaittut. 

Ez zait besterik bururatzen, begietara begiratu nahi diot eta esan: Bejondeizula! Izugarrizko artista zara!

Ez zait besterik bururatzen, begietara begiratu nahi diot eta esan: miretsi egiten zaitut. 

Ez zait besterik bururatzen, begietara begiratu nahi diot eta esan: zorionak!!


Irailaren 4an Zarautzen izan ginen Lizardi Bertso Sariketako finalean. Bertso finaleko puntuaketak (zorionak seioi!) esan aurretik 21.Basarri Bertsopaper Sariketako sariak banatu zituzten. 

1.go saria Ekaitz Goikoetxeak sortutako "Harriak ez du begirik" lanarentzat.
2.saria Ekaitz Goikoetxeak sortutako "Ardiak zenbatzen" lanarentzat.

Biharamunean parez pare jarri gintuzten mikrofonoek, ahotsek, begiradek. Biharamunean irratian.

Bertsoak ederrak dira irakurtzeko, baina, baita entzuteko ere. Hemen duzue aukera. 


2015-09-03

IDEIA BOROBILAK

Cervantesen estatua Toledon_2015-7-28


- Zertan ari haiz?

- Ideia bila nabilek...

- Ideia bila begia luzatuta?

- Begia moztuta ez diat ezer ikusiko.

- Eta zer ikusi nahiko huke?

- Ideia borobilen bat edo...

- Ideiak ez ditun ikusten.

- Begia moztuko diat orduan. Ezer ez ikustea ezereza ikustea baduk, ikausten ez diren ideiak ikusiko ditiat begia moztuta. 

- Kontuz ibili ideia borobilekin. Ez ditun existitzen. 

- Burua hankaz gora jarrita ere ez?

- Hankak buruz behera jarrita ere ez.

- Portzierto... nola mozten duk begia?

- Beste aldera begiratuta! Sorgina!


2015-09-01

UDAKO OPORRETAN GOZATUTAKOAK (mendia)



RINCON DE ALANO (2357 m)_2015-7-9

Uda hasiera polita, aspaldiko txokoei berriro bisita eginez. 



Luisiiiiiiiitooooooooooooooooo!! ;-)



ATXERITO (2374 m)_2015-7-10

Egunero egingo nioke bisita. 





TUC DE MOLIERES (3009 m)_2015-7-16

Ai Irati!



Besarkada baten esanahia iruditan.


Viellatikan Molierrera
gogoz xuabe-xuabe,
han ur jauziak, refugioa,
xendaz xenda etsi gabe,
han Besiberri, han Madaleta,
ta Aneto parez pare,
nahiz ta nekeak arnasa eten
zorion grinez halare,
zeru urdina muxukatuaz
zorion betean gaude. 



Ai Irati!



TUC DE BACIVER (2642 m)_2015-7-17





Inuxenteak gu! Lasai asko geunden Baciver gainean. Irribarretsu artean... Oraindik ezagutzeke inora iristen ez diren aldapak. 


Goizeko zortzietan ez genuen elkar ezagutzen. Arratsaldeko lauretan geure etxeko ateak zabaldu genizkion elkarri. Mendiaren majia, ahoburubihotzek aldi berean hitz egiten dutenean sortzen dena.  Bi lagun handi ditugu orain Lleidan. 

Xavi, Judith, Joxe, Luis eta Irati


PIC DE BASSIERA (2901 m)_2015-7-18

Ustekabean ezagututako bailara. Ezustean ezagututako mendia.


Gerber bailara

Gerber bailaran barna
pozaren bezero,
ur jauzian dutxatu
gara ero-ero,
Mataro aterpea
pasa eta gero,
emozioak jarri 
gaitu bero-bero,
oparia izan da 
Pic de Bassiero. 

Pic de Bassiero

Beherakoan dutxa. Jolaserako beti hartzen dugu astia. Ostadarra zeruan? Ostadarra lurrean. 




MONTARDO (2833 m)_2015-7-20

Urtebete lehenago ezagututako mendia lagun bihurtzen da urtebete beranduago bisita egiten diozunean. 


Montardo

MULHACEN (3479 m) eta ALCAZABA (3369 m)_2015-7-30

Poqueira refugiora bidean. Oso gomendagarria. 



Iberiar Penintsulako sabaia. Zerua gertuagotik ukitu badaiteke, zerua gertuagotik ukitzen den tokia. 



Hondartza mendian. Edo mendian hondartza. 




Aspaldi egin genuen plana
disfrutatzeko garaia,
ezagutu nahi genuelako
Mulhacen mendi garaia,
Alpujarrek ta Sierra Nevadak
ederra dute bisaia,
bihotz-begiak daude gainezka
ezpainartea alaia,
behatz puntekin goxatu dugu
Penintsulako sabaia.


Mulhacen

Bat gutxi ez, eta bi. Zazpi lakuak igaro eta gora berriro. Egun pasa bikaina zukutu genuen!


Alcazaba


VELETA (3396 m)_2015-7-31


Haizeak eraman ez gintuenean. Hilabete pasa da, baina, poltsikoak haizetuta ditut oraindik. 

Veleta_Sierra Nevada (Granada)


Erreka lehorretik 
bideari tira,
haizea hegan-hegan
Veletan ari da,
paisaiaren ederra
gailurren distira,
emozio mordo bat
buelta eta jira,
elur beharrik gabe
irristatu dira. 


AIZKORRI (1523 m) 


Pakistan - Euskal Herria: homosexualitateaz, elikaduraz, erlijioaz, maitasunaz, bizimoduaz... aritu ginen hizketan. Ez gara oso ezberdinak, ez gara batere ezberdinak... eta aldi berean gure ezberdintasunek elkar aberasten gaituzte. 

Khurram, Wakar, Irati, Shazad eta Joxe



MURUMENDI (868 m)-USURBE (703 m)_2015-8-23


Mendiak hori du ederra, patxadaz hitz egiteko aukera ematen duela. Aldapatik aldaparako tartean Pakistan ezagutzeko aukera izan nuen. Pakistan handia da eta elkarrekin aldapa gehiago igoko ditugulakoan... mundiala zara, Khurram!

Khurram, Ekaitz eta Joxerekin; lagun handi batekin, anaia zoragarri batekin eta aita bikain batekin



ITZAGA (1360 m)_2015-8-24


Lorpen polita da mendian ibiltzen ohitu gabe dagoen bati lagundu eta gozatu duela ikustea. Bejondeizula, Gloria!


Luis eta Gloriarekin



















BISAURIN (2670 m)_2015-8-30


Kolore gorrizta hori...



Azken dantza hau...



Azken ginda. Zorionekoak gu, mendia ez baita oporrekin iraungitzen. 








2015-08-28

URA POESIA EGARRI

Lanjaronen (Alpujarrak-Granada) 2015-8-2

Poesia edaten saiatu naiz udan. Ez pentsa, kontua ez da batere erraza. Kontua ez da: bat lepoa bihurritu, bi ileak gobernatu, hiru ahoa zabaldu, lau mingaina kontrolatzen saiatu, bost datorren hori ahoratu eta sei eztarria txirrista bihurtu. Kontua ez da hustu, ase eta betetzea. Kontua ez da hartzea eta gero berriro hartzea. Gakoa emateko momentua ongi aukeratzean dago. Begiak iturriari eman. Ezinbestekoa da begiak iturriari ematea gero lepoa bihurritu, ileak gobernatu, ahoa zabaldu, mingaina kontrolatzen saiatu, datorren hori ahoratu eta eztarria txirrista bihurtu nahi bada. 

Poesia edaten saiatu naiz udan. Egia da betidanik izan dela ura baliabide poetiko literarioa. Baina, ez nuen ezagutzen, nik ez nuen ezagutzen Ura poeta. Ezinbestekoa da begiak iturriari noiz eman ongi aukeratzea. Orduan bakarrik lortuko baituzu urarekin batera poesia edatea. 


2015-08-25

KALABAZAK ORDAINETAN

2015-8-14 Lazkaon

Beste behin plazera izan da, kuadrila! 

Hirugarren udaz jarraian oporretako zenbait goiz tomate, baina, patata, piper, pipermin... artean gozatu eta goxatu ditut. Azazkalak zikintzeko beldurrik gabe hanka sartuz eskua sartzen ikasi dut. Eskua sartzen lurpean, mundua azaleratzeko. 

Mundua biltzen baita Lazkaoko baratzean; Pakistan, Senegal, Nepal, Errumania, Uruguai, Maroko, Euskal Herria eta mundua lan(da)tzen baita irribarre, azalore, solas, kalabaza, izerdi, letxuga, ahalegin, kalabazin, irrika, tipula, gogo, arrautza eta amets artean. 

Lazkaoko mojen lurretan Karitasek jarritako proiektua da: behar duenari irakatsi behar duena lortzen. Arraina eman beharrean irakatsi arrantza egiten. Arantxa, Juanma, Candi, Txomin, Joxe... bejondeizuelaegiten duzuen bolondres lanagatik. Khurram, Wakar, Shazed, Abo, Nenuta, Carlos, Gabi, Kashir, Ramses... bejondeizuela ikasi eta irakasteagatik. 

Beste behin plazera izan da udako asteazken-ostiral goizak zuekin partekatzea. Lurra pozik dago. Ez dago kalabazak ordainetan ematen dituen lur landuaren zoriontasuna bezalakorik. Eta hori zuek lortzen duzue. 


2015-08-18

ATHLEEEEEEEEEEEEEEEEEEEEEEEE

Apirilaren 7an Bilbon
Aupa zuek! 

Gordeta nuen apirilaren 7an goizean goiz ateratako argazki eder hau. Santio Bideko Bilbo-Pobeña etapa hasi berriaren irudi ederra da San Mames aurrealdean ateratakoa. Ospatzen ari ginen; zer ospatzen ari ginen oso garbi ez genuen arren: elkar besarkatuta egotearen zoriona, Santio Bidean aurrera egiteak sortzen duen ilusioaren zirrara, aitona Patxirengandik jasotako Athletic zaletasuna... 

Gordeta nuen apirilaren 7an goizean goiz ateratako argazki eder hau. Gaur bezalako egun bat behar nuen zuei erakusteko. Orduan ospatzen ari ginen; zer ospatzen ari ginen oso garbi ez genuen arren. Gaur ospatzen ari gara; zer ospatzen ari garen oso garbi ez dakigun arren. Hori da futbola. Hori da futbolak sortzen duena. Zerbait defini ezina, ulertezina. Pozik gaude. 

Aupa zuek eta aupa gu, telebistaren bestaldetik zuei aupaka jartzen garenok.