2011-05-24

ITAKA (Sormen elkartrukeak_2011-5-21)



"Munduari bira emateko gogoa da ezinbesteko osagai. Munduari bira eman diezaiokegula sinesteko nahikoa da ilusioari argi egiten uztea. Farolapeko argi ttiki batekin mundua mugitzen hasi ginen, artean argia guk mugiarazten genuela ez genekienean. Eta orain ia hegan garamatza argiak eta mundua gure baitan sentitzen hasi gara, munduari hitz egiten ausartu gerenean. Ostegunean munduari bira eman genion Burlatako Kultur Etxean, bihar munduak emango digu bira argipean. Eta gu ausartu egingo gara, munduari begiratzen.

Sormen elkartrukeak jarri diogu proiektuari izena. Helburua, sortzea eta elkartrukatzea (ematea eta hartzea, ikustea eta sentitzea, elkarrekin eta elkarrentzako). Helburua, gozatzea. Irakasle, ikasle eta gurasoen arteko harremanak estutzea, euskararekin jolas egitea, barruan daramatzagun artista ttikiei oihu egiten uztea... Bihar eguerdiko hamabiak eta laurdenetan eta arratsaldeko zazpietan Zizurko Kultur Etxean elkartuko gara. Etorri nahi izanez gero... beso zabalik egingo dizugu ongi etorria."




Sormen elkartrukeez aritu ginen hizketan larunbateko Itaka saioan Amaia Navarro, Edurne Ipiña eta Gorka Eguinoarekin. Zizurko Institutuko ikasleak dira hirurak eta biharko saioan errezitatuko dituzten olerkiak irakurtzeaz gain, proiektuaren asmo eta helburuez ere hitz egin ziguten.

Literaturarekin batera mendiari ere tartetxo bat eskaini genion. Jesus Mari Garraldarekin "Iñaki Beitia XV.mendi-martxaren" balorazio egin genuen. Eta... Karlos Artolarekin Otsabio gainetik bertsotan aritu nintzen. Karlos mendi-jolasak tarteko ezustean lagun egin dudan donostiarra da, Altzoko Otsabio gainean utzi nuen bertso-puntuari gogotsu erantzun ziona (muxu potolo bat emazteari eta Imanol semeari, harreman kate honen estuleku izateagatik).

Eta astero bezala Patxi Ezkiaga eta Joxe Goikoetxea ere aldamenean izan genituen Ekaitz eta biok... eta... Rufino Iraolak Unamunori begira jarri gintuen ezkaratzean... eta... Gorka Azkaratek Aingeru Epaltzaren Ur uherrak liburua aurkeztu zigun.

Bukatzeko aldrebeskeriez aritu zitzaigun Ekaitz Anje Duhalderen Aldrebeskeria kantua aitzakiatzat hartuta.

Eta hauxe larunbateko Itakak eman zuena... guk izugarri gozatu genuen! Saioa entzun nahi izanez gero, egin koxk! eta jaitsi eta gorde nahiko bazenu...

3 comentarios:

  1. Aupa Irati!

    Saio bikaina izan zen Burlatakoa. Oso testu eta abesti politak entzun genituen.Aurten gainera Zizurkoak ere elkartu zarete. Bejondeizuela! Zorte on eta ea biharkoa ere ondo ateratzen zaizuen. Segi horrela!

    ResponderEliminar
  2. Eskerrik asko, Maialen! Lan polita egin dute ikasleek eta hori da garrantzitsuena, bihar-biharkoak. Gozatu behintzat gozatuko dugu, eta ez da gutxi! Ea bihar ere gure artean ikusten zaitugun! Muxu bat!

    ResponderEliminar
  3. Ongi, oso ongi ari zarete lanean, ezinbestekoa da ikasleen emozioak eta sentimenduak mugitu araztea ikastetxea eta ikasketak ilusioz hartu eta bizi ahal izateko. BEJONDAIZUELA denoi!hori da bidea; sinistea, denok badugula zerbait emateko eta hartzeko.Bizitzak ez du sekretu ezinezkorik, dena uste baino errezagoa da.Borondatea behar da, borondatea eta norberengan sinistea.

    ResponderEliminar