2009-12-14

ORITZA


HOR-HITZA, ORITZA.

Hizkuntza jolas, hizkuntza gose, hizkuntza mami bihurtzen denean gozotasuna dastatu egiten du mingainak, ikasitako hitz berriaren esentziak ikas-egarria asetzen duen neurrian. ORITZA. Amak lehen bi-hiru egunetan haurrari ematen dion esnea. Horixka eta lodia. Esneak baino proteina gehiago eta koipe gutxiago ditu. Gainera, hesteetako bakterien oreka iraunkortzeko prozesuan parte hartzen du, antigorputzetan aberatsa da eta haurra babesten du infekzioetatik. Noski, amak haurrari ematen dion berdina da, behiak txahalari ematen diona.

Larunbaterako behien inguruko saioa prestatu nuen irratsaiorako. Lazkaomendiko Iztueta Azpiko Maixux eta Ainitze izan ziren irratian. 45 esne-behik ekoizten du esnea egunero beraien baserrian. Aurretik Manexek lagundu zidan saioa janzten eta hari ikasi nion oritza hitza. Gero, Ainitzeren hitzetan entzun nuenean paper gainean baino goxoagoa, beteagoa iruditu zitzaidan. Oso irratsaio ederra izan zen Santa Lutzi bezperakoa. Hitz berri bat ikasita joan nintzen gainera etxera. ORITZA, bizitzarako indar, bizitzarako babes. Lehen ahokadan hor hitza, oritza, amak alabari ematen diona.

Hortik aurrera, hor hitza, hizkuntza jolas, hizkuntza gose, hizkuntza mami bihurtzeko.

Ah! Bejondeizula Maialen! Ahokada hitz oparitzeagatik, bertsoaren damak oritza ematen jarrai dezala bi-hiru egunetik harago.



2 comentarios:

  1. Oritza: irakasgai polita, aberatsa...zure blogean oso gustora sartzen naiz eta, beraz, zorionak eta mila esker.
    Aupa Maialen, ez emakumea, ez gizona, bertsolaria baizik, eta nolako bertsolaria gainera!
    Ixabel

    ResponderEliminar
  2. Zerbait berria, niretzat behintzat bai! Eta ni poztu egiten nau egunero zerbait berria ikasteak! Atzo ikasle bati eskerrak eman nizkion ez nekien zerbait ikasteko aukera eman zidalako bere azalpenarekin. Gustura joan ginen biok etxera!

    ResponderEliminar