ITAKA_Idoia Granizo_2015-5-9

Ekaitz eta Idoia Segura Irratian_2015-5-9

Ni zure ezaguna naiz, zu haren ezaguna zara eta hark ezagutzen du beste norbait. Horrela sortzen da sare mundutarra. Horrela iritsi zen Idoia larunbatean irratira ni zure, zu haren eta hura gainerakoen lagun delako. DBH 4.maila egiten ari da Altsasuko institutuan eta besteak beste idaztea izugarri gustatzen zaio: Hausnartu, sentitu eta begirada zorroztu ondoren paperean irudikatzen ditu hitzez literatur marrazkiak. Zeharkako txirula jotzen du eta bertsotan ere aritzen da. 

Larunbatean ezagutu genuen elkar, solasean aritu ginen luze eta zabal, eta bere altxorrik preziatuenak irakurri eta abestu zizkigun irratian. 

Honatx gozagai Idoiak eskainitakoa. 

OILO IPURDIA

Gaur Liburuaren Eguna. Ezinbestean gaur ere Andraizearen eguna ere bada niretzat; ezinbestean gaur ere Iratiren eguna ere bada niretzat.

Iraitz Urkulori irakurri nion martxoaren 1ean: "Irati Goikoetxearen ahots pertsonal eta indartsua berri pozgarria da euskal literaturarentzat. Izan ere, Andraizea liburuko ipuinek afektuak —hau da, sentsazio, sentimendu eta emozioak— literatura sortzeko lehengai gisa baliatu eta irakurleari oilo-ipurdia eragiteko dohaina duen idazle bat ezagutarazten digute."

Asko izan dira, baina, hauek Andraizeak oparitu dizkidan gozokietako batzuk; eskerrik asko ondoan izan zaituztedan eta izaten ari zaituztedan guztioi: 

• Urtarrilaren 9an Zumarraga-Urretxuko irrati librean KKinzona irratian Gorka Santesteban, Alex Areizaga eta Ekaitz Goikoetxearekin Andraizearn inguruan pasatako (eta gozatutako) ero tarte zoragarria. Izugarri ongi pasa genuen eta hausnarketa oso aberats eta ederrei egin genien tira. Hementxe barre algara mordoxka bat korapilatuta:

http://www.ivoox.com/gu-ta-gutarrak-irati-goikoetxea-2015-09-01-audios-mp3_rf_3942012_1.html

• Mikel Alvarezekin Goierri Irrati Telebistan. Ederra da irratia ikusi ahal izatea. Ezkutatzen den guztia agerian jartzea.

 
Ikusi Irratia - Irati Goikoetxea from GITB on Vimeo.

• Otsailaren 7a hunkigarria izan zen. Ederra da herrian bertan zeure liburua aurkeztea, ederra da ezagutzen zenituen eta ezagutu berri dituzun lagunekin taula gaina partekatzea. Ederra da emozionatzea. Eskerrik asko kuadrila nire ondoan hitzekin jolasean une zirraragarri hartan izateagatik. Eskerrik asko Aitor, Izaskun, Irati, Itziar, Iñigo, Itsasne, Naomi, Mario, Jon, Ekaitz, Patxi eta 

 
Andraizea: Aurkezpen ikuskizuna from GITB on Vimeo.

• Otsailaren 20an Basauriko Marienean Danele Sarriugarte, Ana Malagon eta Amaia  Alvarezekin izandako solasaldi bikaina. Letra eta tripa artean ibili ginen, gozo-gozo, goxo-goxo.

• Kazetari ezberdinek kritika, deskribapen ezberdinak idatzi dituzte. Dena da ikasbide, dena da entzungozo. 

http://zubitegia.armiarma.eus/?i=786

Ahoz aho_ITAKA_2015-4-18

Ekaitz, May, Irati, Pili eta Imanol Segura Irratian_2015-4-18

Zer da ipuin bat? Begiak itxi beharrik gabe amets eginarazten dizun hori (hori, zer?)? Esan gabe kontatutako guztia edo kontatu gabe esandako guztia? Zer da ipuin bat? Eskua luzatu eta ukitu nahi den oro? Edo eskua poltsikoan sartu eta ukitzen ez den oro? Zer da ipuin bat? Lau dimentsiotako gunea? Lau dimentsiotako unea? Ipuina norena da? Kontatzen duenarena edo entzuten duenarena? Zer gertatzen da ipuin bat kontatu eta une berean entzuten den une horretan? Existitzen da une hori?

May Intujai Teatro taldeko kide da Bea eta Alairekin batera. Sekulakoa da egiten duten lana, sekulakoa baita irudimenarekin egin daitekeen lana.  Pili, Imanol eta Ekaitz martxoaren 20an Ahoz aho ipuin kontaketa lehiaketako finaleko partaideak dira (Zorionak Pili kalabazarengatik eta gainerakooi bejondeizuela!- baita Saioa eta  Josuneri ere!). Izugarri gozatu genuen larunbatean mahai inguruan solasean. Gozatu eta ikasi. 

Solasaldiaren ondoren Jose Luis Asensiorekin hizketan aritzeko tarte bat ere hartu genuen. Jose Luisek proiektu zoragarria du esku artean, argia ikustear da eta horren berri eman zigun. Iruñeako Udalak egile berrientzako antolatzen duen literatur lehiaketa irabazi zuen 2013an eta hortik sortu da Ixa Asap! proiektua. 

Aitziber Garmendia adimen emozionalaren lanketak duen garrantziaz aritu zitzaigun Ezkaratzetik eta Joxe Goikoetxeak trenetik bueltan hitzen trintxeran murgildu gintuen esku artean "Neronek tirako nizkin" liburua hartuta. 

zero ken zero

Izan eta ez izan. Dena eta ezer ez. Zurekin eta zu gabe. Hutsa eta betea.

"Irati, zero ken zero zer da? zero, ezta?" Xabierrek azkeneko matematika azterketa partzialean eginiko galdera. Bai, azterketetan erantzuteko bakarrik ez, galderak egiteko tartea ere hartu behar da. Dakienak galdetu egiten du, ez dakienak eskatu.  "Zuk zer uste duzu?", "Ba, ez dakit... badaezpada ere... indeterminazioen kontua dela eta...".

Eta orain hemen nago. Ezer ez dagoen tokitik ezereza kentzen. Eta batez ere hori nola egiten den asmatzen. 
Izan bada, baina, izan gabe, Harrapazak! Egon badago, baina, ezin ikusi. Harrapazan! Joan joaten da, muxuka baina ukitu gabe. Harrapazank! Tarteka halakoak bota (halakoak esan baino bota egin behar dira, indarra eman behar zaie, gainerakoan bide erdian gelditzen dira erdi zorabiatuta, erdi zintzilik infintuetako hari muturretatik) eta ikasleei begietara begiratzen diedanean, krokodiloak ikusten dizkiet, hortz zorrotz mutur luze. 

Hori du matematikak ederra, dena zalantza eta dena zehaztasun duela bere baitan. Dena ihesbide eta dena lotura. 

"Bai, bai, Irati, baina, zer da zero ken zero?" "Paper gainean zero, zure baitan zuk nahi duzuna." Hori da izan eta ez izateko norberak duen gaitasuna. Eta gaitasun hori galdetzen duenak lortzen du.

Irrintzi eta arrantza

Gernika eta Morga arteko lur galduetan_2015-4-5

Iratiiiiiiiiiiiiiiiiiiiiiii, esnau hai! Ez al haiz konturau... hilabete damakin blogeko izarapen lo. Nun sartu haiz, nungo ametsetan kateau haiz? Ingurau naun tarteka hiregana baino... arrantzaka hasi behar kaso pittin bat ingo badian. Ta bakin, zaldik arrantza ta astok irrintzi itten donen... hartu arkatza ta papera, zer kontaue nunbaittetik aterako da ta. 

Ba hoixe besteik ez dinat nahi, Irati: tarteka-tarteka hire kontuk irakurri. Ta behar baden ingo inat arrantza (eta arrantzan); altuxago... ba altuxago, hortzak agirin... ba hortzak agirin... Baino hik ez utzi kontatzei ni behintzet gustoa eoten naun eta hirek irakurri ta aitzen. 

Eskuminek hik dakian horren partetio, hue re hi noiz blogeratuko zain zeon. 

Txirrista ederragorik!

Molierera bidean_2015-2-18

UR JAUZIA MIHI LUZE BAT DA
IZUAK HOTZ
BIHURTZEN DUENEAN,
IKARAK BERO
ESTUTZEN DUENEAN,
TXIRRISTA ZURI BIHURTZEN DEN
MIHI LUZE BAT DA
UR JAUZIA

ITAKA_GERRIKO BEKA_2015-2-7

Aitor, Aratz eta Goretti Segura Irratian_2015-2-7

Sentitu. Sentitu dardara txiki bat. Begiradan su txinpartak, bihotzean matxinsaltoak eta tximeletak ile-kordeetan, atximur txiki bat haizeari, itsasoaren lo sakonean ametsak eta zuloak elur-jauzi beltzetan. Irribarreak bekokian marraztuak, malkoak listutan urtuak, Eta zu... nik zer sortuko hitz jolas, kanpo gozo, iturri parrastan. Eta zu... nik zer sortuko. Sentituz, ginena sortuz, izango garelako. Sentitu. Sentitu dardara txiki bat. Begiradan su txinpartak, bihotzean matxinsaltoak eta tximeletak ile-kordeetan.

Aitor Aritzeta eta Goretti Soroarekin solasean aritu ginen XVII. Gerriko Ikerlan-Beka irabazi duen "Sentituz, izan sortzaile! Sormen emozionala goi-mailako hezkuntzan sustatzeko esku-hartze programa"z. Gustura! Aratz txikiak ere parte hartu zuen. Mila esker hirukote! Emozionatu egin ginen, sentitu egin genuen eta oharkabean... sortu!

MARTXOAK 9: gaur ere bai

Elkarrekin; nola bestela?

IES Zizur BHI-n_2015-3-9

ITAKA_Xabier Mendiguren_2015-1-31

Xabier Mendiguren

Ez dakit. Ez dakit orratzak zist ala zast egiten duen. Ez dakit indizioak ala xiringak diren zaurgarriago, praktikanteak ala medikuak beldurgarriago. Ez dakit torturatuen mina  izendatzen,  pusilanime ahoskatzen. Ez dakit turista itxurarik gabe bidaiatzen, barne bidaietarako bikotekide egokia aukeratzen. Ez dakit. Ez dakit... Ez dakit arantzek honantz egiten dutela besterik, barrurantz... (Ekaitz Goikoetxea)

Xabier Mendiguren Elizegi idazle beasaindarrarekin aritu ginen solasean urtarrilaren 31n "Arantzak barrurantz" liburuaz. Arantza arteko larrosen bila aritu ginen eta aurkitu, aurkitu genituen kanpoaldeko barrukietan. 

Bazen behin...

Vielhan_2015-2-15_Koko-Kiki-Kuku eta nire eskua

Bazen behin esku ahurra. Eta irakurtzen ikasi zuten. 

ITAKA_Koldo Zubeldia_2015-2-14

Koldo Zubeldia Segura Irratian_2015-2-14

Hamazazpigarrenean aidanez; inoiz baino indartsuago, inoiz baino umoretsuago, inoiz baino erotikoago, inoiz baino gertuago... Aldiko, aldiko, milimetroka-milimetroka laburtzen da bion arteko distantzia. Mozorrotuta ibili ginen sudur gorri eta begi bakar. Ongi pasa genuen; batez ere, ongi pasa genuen. Eta ikasi, asko ikasi genuen. 

Mila esker, Koldo! Beste behin, plazera izan zen. 

ITAKA_Ana Gisasola_2015-12-30

Ana Gisasola Segura Irratian_2015-1-30

Indarra. Barne ohiartzunen garrasia, begirada distiraz beteen sakontasuna, pauso ibiltariak korrika. Indarra.  Bazen behin paper zuri baten gainean indarra marraztu zuen emakume bat. Marraztu zuen zirkulu bat, eta zirkuluaren barruan irudikatu zituen esku bi. Ispilu aurrean itsatsi zuen marrazkia eta behin eta bi aldiz errepikatu zion bere buruari: hau nire indarra da. Ispilua pitzatu egin zen  eta kristal txikien ttinttirrin hotsak behin eta bi aldiz errepikatu zuen: hau nire indarra da. Hau nire indarra da. Emakumeak banan-banan itsatsi zuen kristal hautsi bakoitza; ispilua berreraiki zuen eta ispiluaren xuxurla goxoak  behin eta bi aldiz errepikatu zion: Hau zure indarra da. Hau zure indarra da. Emakumeak marrazki asko egin ditu azken urteetan. Marrazki horietan ez dago marrarik, ez dago arrastorik, ez dago margorik paper zurietan.  Ezer ez simulatuak mundua islatzen dio. Ez du ispilurik behar. Badaki indarra berea dela. 

Indarra sartu genuen poltsikoan Ana Gisasolarekin batera. Orain gutxi argitaratu du "La fuerza está en tu interior" liburua eta dagoeneko bigarren argitaralpenarekin aurrera doa. Zorionak, Ana eta eskerrik asko urtarrilaren 30ean emandako ikasgaiengatik. 

ITAKA_Mikel Alvarez_2015-1-17

Mikel Alvarez Segura Irratian_2015-1-17

Maleta bat egitea erraza da, maleta bat betetzea zaila. Maleta batean sar daitezke bost jertse eta hiru galtza, sei galtzerdi pare eta zortzi kulero Maleta batean sar daitezke hiru kezka eta bi oroitzapen, lau iritzi eta bost irribarre.  Maleta batean sar daitezke beldurrak eta irrikak, izerdiak eta korapiloak, lotsak eta isiltasunak. Maleta bat kobazulo bat da, sumendi bat, lurjauzi bat. Maleta batekin mundua konkista daiteke eta burua galdu. Maleta bat egitea erraza da. maleta bat betetzea zaila. Zure baitango zirrizkuak kabituko dira beti. Maleta batek infinitu zulo ditu. 

Mikel Alvarez gazte beasaindarrarekin aritu ginen solasean urtarrilaren 17an. Atalka-atalka "Finlandia" liburua argitaratzen ari da, internet bidez eta liburu forman. Maleta esku artean, ederra Txomin eta Mikelekin egin genuen bidaia. 

Txominek, Finlandia-ko protagonistak, kantu bat oparitzen-lotzen die inguruko pertsonei. Mikeli saioaren bukaeran Itakari kantu bat oparitzeko eskatu nion. Hauxe tatuatu zigun itakazaleoi eta uste dut bete-betean asmatu zuela. Mila esker!

ITAKA_Toti Martinez de Lezea_2015-1-10

Zer da hilabete denbora tarte horretan oroitzapen gozoen zukua indartu egiten bada? Urtarrilaren 5ean Toti eta Albertoren etxean egoteko zoriona izan genuen. Goizean Mañariartik Mugarrarako irteera zoragarriaz gozatu ondoren, bazkalostea goz(x)atzera joan ginen Larrabetzura. Toti eta Albertoren etxeak beso zabalik hartu gintuen. Hitz egin, solastu, jolastu genuen eta emozionatu egin ginen. Etxera grabagailua Totiren ahots potentearekin jantzita eraman genuen; hala osatu genuen urtarrilaren 10eko Itaka saioa: Totiren ahotsarekin, eta presentziarekin. Esperientzia zoragarria izan zen eta adiskidetasun-harreman eder baten hasiera. Eskerrik asko, bikote!

Totiren etxean urtarrilaren 5ean. Argazki Alberto Albaizarrek ateratakoa da. 

Laino arteko elurretan begiradak izozten diren ezpainarteetan istorioak kontatzen dira iraganeko koadro behe lainoz beteei buruz. Zaldiak datoz trostan, indarrez, kolpeka-kolpeka, lurra esnarazi nahiko balute bezala. Sorgin baten kantu-irri-hitzetan herensugeak dantzan dabiltza jentilen arnas-hotsen erritmora. Lamiek begiak itxi dituzte eta badatoz, badatoz haizetan ito ziren isiltasunak, beso mutilatuz marraztutako besarkadak. Badatoz, badatoz, sustrai bihurtu ziren itzalak. 

Plazer bat izan zen, plazer bat izaten ari da! Eskerrik asko!

Entzun isiltasuna

Izaspira bidean. Jon Esnaola izaldarraren argazkia

Bost lagunen arteko isiltasuna mundu zuri bat da (eta garrasika ari da)