URA POESIA EGARRI

Lanjaronen (Alpujarrak-Granada) 2015-8-2

Poesia edaten saiatu naiz udan. Ez pentsa, kontua ez da batere erraza. Kontua ez da: bat lepoa bihurritu, bi ileak gobernatu, hiru ahoa zabaldu, lau mingaina kontrolatzen saiatu, bost datorren hori ahoratu eta sei eztarria txirrista bihurtu. Kontua ez da hustu, ase eta betetzea. Kontua ez da hartzea eta gero berriro hartzea. Gakoa emateko momentua ongi aukeratzean dago. Begiak iturriari eman. Ezinbestekoa da begiak iturriari ematea gero lepoa bihurritu, ileak gobernatu, ahoa zabaldu, mingaina kontrolatzen saiatu, datorren hori ahoratu eta eztarria txirrista bihurtu nahi bada. 

Poesia edaten saiatu naiz udan. Egia da betidanik izan dela ura baliabide poetiko literarioa. Baina, ez nuen ezagutzen, nik ez nuen ezagutzen Ura poeta. Ezinbestekoa da begiak iturriari noiz eman ongi aukeratzea. Orduan bakarrik lortuko baituzu urarekin batera poesia edatea. 

KALABAZAK ORDAINETAN

2015-8-14 Lazkaon

Beste behin plazera izan da, kuadrila! 

Hirugarren udaz jarraian oporretako zenbait goiz tomate, baina, patata, piper, pipermin... artean gozatu eta goxatu ditut. Azazkalak zikintzeko beldurrik gabe hanka sartuz eskua sartzen ikasi dut. Eskua sartzen lurpean, mundua azaleratzeko. 

Mundua biltzen baita Lazkaoko baratzean; Pakistan, Senegal, Nepal, Errumania, Uruguai, Maroko, Euskal Herria eta mundua lan(da)tzen baita irribarre, azalore, solas, kalabaza, izerdi, letxuga, ahalegin, kalabazin, irrika, tipula, gogo, arrautza eta amets artean. 

Lazkaoko mojen lurretan Karitasek jarritako proiektua da: behar duenari irakatsi behar duena lortzen. Arraina eman beharrean irakatsi arrantza egiten. Arantxa, Juanma, Candi, Txomin, Joxe... bejondeizuelaegiten duzuen bolondres lanagatik. Khurram, Wakar, Shazed, Abo, Nenuta, Carlos, Gabi, Kashir, Ramses... bejondeizuela ikasi eta irakasteagatik. 

Beste behin plazera izan da udako asteazken-ostiral goizak zuekin partekatzea. Lurra pozik dago. Ez dago kalabazak ordainetan ematen dituen lur landuaren zoriontasuna bezalakorik. Eta hori zuek lortzen duzue. 

ATHLEEEEEEEEEEEEEEEEEEEEEEEE

Apirilaren 7an Bilbon

Aupa zuek! 

Gordeta nuen apirilaren 7an goizean goiz ateratako argazki eder hau. Santio Bideko Bilbo-Pobeña etapa hasi berriaren irudi ederra da San Mames aurrealdean ateratakoa. Ospatzen ari ginen; zer ospatzen ari ginen oso garbi ez genuen arren: elkar besarkatuta egotearen zoriona, Santio Bidean aurrera egiteak sortzen duen ilusioaren zirrara, aitona Patxirengandik jasotako Athletic zaletasuna... 

Gordeta nuen apirilaren 7an goizean goiz ateratako argazki eder hau. Gaur bezalako egun bat behar nuen zuei erakusteko. Orduan ospatzen ari ginen; zer ospatzen ari ginen oso garbi ez genuen arren. Gaur ospatzen ari gara; zer ospatzen ari garen oso garbi ez dakigun arren. Hori da futbola. Hori da futbolak sortzen duena. Zerbait defini ezina, ulertezina. Pozik gaude. 

Aupa zuek eta aupa gu, telebistaren bestaldetik zuei aupaka jartzen garenok.

OTSAILA URTZEN DENEAN...

Moliere-ra bidean 2015-7-16

                        Otsailak uztaila du bere baitan edo uztaila otsaila urtua baino ez da? 

                                 EGIN KLIK BELDURRIK GABE ARGAZKIAREN GAINEAN

ITAKA_Koldo Zubeldia_2015-7-11

Koldo Zubeldia Segura Irratian_2015-7-11

Albiz. Erositako azken liburuaz. Behin egin eta berriro egindako galderez. Udako beroaz. Treneko joan etorriez. Legazpiko Josuz. Gabrielez. Irribarreez eta esan gabeko isiltasunez. Tarte polita, aberatsa eta interesgarria izaten da Koldo Zubeldia poeta zaldibiarrarekin partekatzen duguna. Larunbatekoa ere ederra izan zen. Gozoa. Hemeretzigarrenez elkartu ginen eta lehenengo aldia balitz bezala gorritu genituen elkarren lotsak. 

hiru lore

Atxeritotik bueltan_2015-7-10

Nork ikusten ditu hiru lore?

ITAKA_Nekane Yurrebaso_2015-7-4

Nekane Yurrebaso Segura Irratian_2015-7-4

Zer dago begirada hurbilaz harago? Zer dago eguneroko errutina zoroaz harago? Existitzen da iratzargailuak esnatzen ez duen egunsentirik? Kandelek itzaltzen ez duten ilunabarrik? Mundua motxilan sartzen ez bada, zergatik ez eman motxila munduari? Eten eta hasi ezer bukatu beharrik gabe. Hautsi ezer puskatu beharrik gabe. Joan, eta ulertu, ulertu bazoazen heinean gero eta gertuago zaudela hemendik. Tailandia, Laos, Kanbodia, Indonesia... bidea egin oinak zikindu ahala burua garbituz. Eta iristean hona edo hara (berdin dio nora) kontatu. Emozionatu.

Nekane Yurrebaso urretxuarrarekin aritu ginen solasean uztailaren 4an. Lau hilabetez ibili da HAN. Eta sentipenak pil-pilean ekarri dizkigu HONA. Ederra solasaldia; ederra izan da Nekaneren  bizipenekin irratsaioa ikasgai bihurtzea. 

A ze parea...

Barraskikoa Aginara bidean_2015-7-5


Zer gertatzen da bare bati karakolaren oskola
gainean jartzen diogunean?

ITAKA_Nekane Arizti eta Anita Alonso_2015-6-27

Nekane Arizti Segura Irratian_2015-6-27

Irratira dei bat, etxera beste bat. Telefono zenbaki ezezagun bat. Watsap bat tarteko. Ipuinak. Animatuko zara? Bai. Bai? Bai. Bi ipuin. Eta solasaldi bat. Nagore. Bai, tira, Nekane. Arizti. Lapurtutako zerbait. Lapurtutakoa? "Lapurtutakoa". Galtza arrosak. Politak dira. Ipuinak. Basurdea eta amona. Suhiltzaileak. Zenbat metro? Zerua hor dago. Edo han. Nondik begiratzen zaion. 

Ezustean lagun berri bat egin dut. Literaturarekiko zaletasuna eta gai sozialekiko kezka partekatzeko lagun bat. Irratiak lotu gaitu, irratian lotu gara. Bizitzak halakoak oparitzen dizkigu, bizitzari halakoak oparituarazten dizkiogu. 

Nekane Arizti, ekainaren 27an Aduna, Aldaba, Tolosatik bueltan Seguran izan genuen laguna. 

Nekane ez zen ekainaren 27ko gonbidatu bakarra izan. Anita Alonso aktoresa eta antzerki zuzendari beasaindarrak ere egin zigun bisita. Herritar talde baten ardura hartu eta antzerkia sortzen hasia da hutsetik. Beasain herriaren 400.urteurren ospakizuneko ekitaldi bat gehiago izango da herri antzerkia. Estreinaldia: irailaren 25ean. Bitartean: lana gogotik egin behar. Lana, jolasa eta ilusioa uztartu eta herria antzoki eta herritarrak antzezle bihurtzea da asmoa. Irratian ere izan genuen jolaserako aukera. Finean antzerkia hori baita, jolastea ez,  jolas egiten asmatzea. 

Anita Alonso Segura Irratian_2015-6-27

ITAKA_Jose Luis Asensio_2015-6-20

Jose Luis Asensioren Ixa  Asap! liburua

Ustekabean dena gerta daiteke, eta ezer gertatu ez den sentipena izan. Ustekabean kontzientziak kopeta urratzen du eta pentsamendua orbain bihurtu. Ustekabean ipuin batek hozka egiten dio beste bati eta izuaren aurpegian hitzak tatuatzen dira, irudiak kontatzen dira eta bat-bateko ustekabean oihu isil batek  mututzen ditu esan gabe utzitakoak. Ipuinak lotzen dituen korapiloak hori du ederra, korapilo dela,  eta baldintzarik gabe errealitate dela bere askatasunean.

Jose Luis Asensio -> Etxarri Aranatzeko idazle gaztea, Iruñean bizi dena. Lau ipuin biltzen dituen "Ixa Asap!" bere lehen liburuaz aritu ginen solasean irratian ekainaren 20an. 

ITAKA_ Maider Agirre_ 2015-6-13

Maider Agirre

Segundo bateko leherketa infinitua izan daiteke. Txalojotze soinu isil bat, zotin bulkada bat itotasunean. Izan daiteke ordulariaren dantzaldia, denboraren kontrapasa, irribarrea kontrako eztarrian. Zulo suizida baten garrasia izan daiteke. Zulo suizida baten garrasia zuloan, jostorratz baten ziztada pazientziaz betea.  Izan daiteke instante eterno bat edo eternitatea instante batean, izan daiteke bihotzero-bihotzero bihotzetik bihotzera ezpainen pentsamenduaren oihartzuna.

"Bihotzero" lehen eleberria aurkezten izan zen Maider Agirre beasaindarra ekainaren 13an gure artean. Liburua ilustratu duen Idoia Beratarbidek eta Joxerra Garziak ere parte hartu zuten. Bihotzetik aritu ginen denok, inoiz baino gehiago bihotzetik. 

Lokatzezko

2015-6-7 Txindokitik bueltan

Lokatzezko bideak baino nahiago ditut bidezko lokatzak

ITAKA_ Koldo Zubeldia_2015-5-16

Koldo Zubeldia Segura Irratian

Zer den jolasean aritzea. Zer den begietara begiratzea. Zer den irribarre egin aurreko serio planta gozoa. Zer den euria paper gaineratzea. Hainbatgarrena. Ez dio axola. Ez gara aspertzen. Ez dugu elkar aspertzen. Ezberdina da elkarrekin pasatako larunbat goiz bakoitza. Laster izango dugu hurrengoa berriro. Etxeko lana jarri diogu elkarri hurrengorako. Zuk ere parte hartu nahiko bazenu hasi buru-liburuei eragiten. Egin beharrekoa: euriari begira egon. Egin beharrekoa: euriak sortzen dituen soinu-hots ezberdinei hitz-izena jarri. Hamar ezberdinen bila gabiltza. Poesia hori da. Eta ondo asko daki hori Koldo Zubeldiak. Poesia hori ere bada. 

ITAKA_Idoia Granizo_2015-5-9

Ekaitz eta Idoia Segura Irratian_2015-5-9

Ni zure ezaguna naiz, zu haren ezaguna zara eta hark ezagutzen du beste norbait. Horrela sortzen da sare mundutarra. Horrela iritsi zen Idoia larunbatean irratira ni zure, zu haren eta hura gainerakoen lagun delako. DBH 4.maila egiten ari da Altsasuko institutuan eta besteak beste idaztea izugarri gustatzen zaio: Hausnartu, sentitu eta begirada zorroztu ondoren paperean irudikatzen ditu hitzez literatur marrazkiak. Zeharkako txirula jotzen du eta bertsotan ere aritzen da. 

Larunbatean ezagutu genuen elkar, solasean aritu ginen luze eta zabal, eta bere altxorrik preziatuenak irakurri eta abestu zizkigun irratian. 

Honatx gozagai Idoiak eskainitakoa. 

OILO IPURDIA

Gaur Liburuaren Eguna. Ezinbestean gaur ere Andraizearen eguna ere bada niretzat; ezinbestean gaur ere Iratiren eguna ere bada niretzat.

Iraitz Urkulori irakurri nion martxoaren 1ean: "Irati Goikoetxearen ahots pertsonal eta indartsua berri pozgarria da euskal literaturarentzat. Izan ere, Andraizea liburuko ipuinek afektuak —hau da, sentsazio, sentimendu eta emozioak— literatura sortzeko lehengai gisa baliatu eta irakurleari oilo-ipurdia eragiteko dohaina duen idazle bat ezagutarazten digute."

Asko izan dira, baina, hauek Andraizeak oparitu dizkidan gozokietako batzuk; eskerrik asko ondoan izan zaituztedan eta izaten ari zaituztedan guztioi: 

• Urtarrilaren 9an Zumarraga-Urretxuko irrati librean KKinzona irratian Gorka Santesteban, Alex Areizaga eta Ekaitz Goikoetxearekin Andraizearn inguruan pasatako (eta gozatutako) ero tarte zoragarria. Izugarri ongi pasa genuen eta hausnarketa oso aberats eta ederrei egin genien tira. Hementxe barre algara mordoxka bat korapilatuta:

http://www.ivoox.com/gu-ta-gutarrak-irati-goikoetxea-2015-09-01-audios-mp3_rf_3942012_1.html

• Mikel Alvarezekin Goierri Irrati Telebistan. Ederra da irratia ikusi ahal izatea. Ezkutatzen den guztia agerian jartzea.

 
Ikusi Irratia - Irati Goikoetxea from GITB on Vimeo.

• Otsailaren 7a hunkigarria izan zen. Ederra da herrian bertan zeure liburua aurkeztea, ederra da ezagutzen zenituen eta ezagutu berri dituzun lagunekin taula gaina partekatzea. Ederra da emozionatzea. Eskerrik asko kuadrila nire ondoan hitzekin jolasean une zirraragarri hartan izateagatik. Eskerrik asko Aitor, Izaskun, Irati, Itziar, Iñigo, Itsasne, Naomi, Mario, Jon, Ekaitz, Patxi eta 

 
Andraizea: Aurkezpen ikuskizuna from GITB on Vimeo.

• Otsailaren 20an Basauriko Marienean Danele Sarriugarte, Ana Malagon eta Amaia  Alvarezekin izandako solasaldi bikaina. Letra eta tripa artean ibili ginen, gozo-gozo, goxo-goxo.

• Kazetari ezberdinek kritika, deskribapen ezberdinak idatzi dituzte. Dena da ikasbide, dena da entzungozo. 

http://zubitegia.armiarma.eus/?i=786