ITAKA_Mutur Beltz eguna_2014-9-13

150 urte dira trena Beasain eta inguruetara iritsi zela. Kultur eragileak elkartu eta lanean aritu dira azken hilabeteotan. Iraileko azken asteburuan festa giroa nagusituko da Beasainen. Zu ere gonbidatuta zaude! Anima zaitez eta egiozu bisita Beasaini eta bide batez XIX.mende amaierari! 

Irailaren 13an  Mutur Beltz egunaz hitz egiteko elkartu ginen Segura Irratian. Maider Agirre (Kultura eta Euskara teknikaria), Garbiñe Zurutuza (Kultura eta Euskara zinegotzia), Jabier Elorza (Lemniskatako kidea) eta Joxe Goikoetxea (herritarra) bildu ziren mahaiaren bueltan; Xabier Garmendia (Txilibutxof-eko kidea) ere telefonoz aritu zen.  Hauxe kontatu zigutena:

Egitaraua:

• Irailak 18, osteguna:
  
  • 11:00etan: Igartzako Jauregian, Mutur Beltz pintxoen aurkezpena, herriko ostalarien eskutik. Pintxoei laguntzeko Sagardo dastaketa izango da.
  
  
• Irailak 26, ostirala:
  
  • 17:30ean: Geltokitik Igartzara, Musika Eskolako trikitilarien kalejira.
    
  • 18:00etan: Igartzako Jauregian, kantu emankizuna Kantu-jira taldearekin.
    
  • 18:15ean: Igartzako Jauregian, ekitaldien aurkezpena eta erakusketaren inaugurazioa (urriaren 5a arte ikusgai).
    
  • 19:00etan: Igartzako Jauregian, hitzaldia Juanjo Olaizolaren eskutik (Azpeitiako Trenaren Museoko zuzendaria) eta luntza.
    
  • 22:30ean: Gernika pasealekuko frontoian, Trikitixa Jaialdia Musika Eskolako Trikitilarien eskutik.
  
  
• Irailak 27, larunbata:
  
  • 17:00etan: Loinazko San Martin plazatik irtenda, Musika Eskolako trikitilariek eta Erraldoiek herriko haurrak lagunduko dituzte erromeri txikian. Saioari amaiera emateko ikasitako trenaren bertsoak.
    
  • 17:30ean: Barrendain plazan, urteurreneko pregoia.
    
  • 17:45ean: Barrendain plazan, bertso desafioa, balkoitik balkoira.
    
  • 18:30ean: Barrendain plazan, herri-proba.
    
  • 20:30ean: Barrendain plazatik irtenda, erromeri handia.
    
  • 21:00etan: Plazazpian, afaria.
  
  
  • Gernika Pasealekuko girotzea:
                 -19:00-20:00 haur jolasak aparkalekuan Txilibutxof taldearekin                                      - Kontakizuna Irati Goikoetxearekin.                                                                                  - 19:00-20:00. Bolatokia aparkaleku ondoan jolastu  nahi duenarentzat.                          - Artisauak                                                                                                                          - Sagardo eta muztio banaketa  doan.                                                                                - Kale animazio antzeztua: Aldabe, Asmube, Hijos de Martin y Loinaz                              - Argizpi elkartearen argazkiak.                                                                                          

• Irailak 28, igandea:
  
  • 11:00etan: Bidaia gidatua. Ibilbidea: Beasain-Ormaiztegi-Altsasu-Ormaiztegi-Beasain.

Itaka_KOLDO ZUBELDIA2014-9-6

Koldo Zubeldia Segura Irratian

Hamabost: bi esku eta oin bat, hilabete erdi bat, ordu laurden bat, bederatzi orduko loaldia egiten duenarentzat egun bete bat, nerabezaroa. Hamabost: aspertzeko astirik gabe jardunean aritzeko denbora tartea. Hamabost: urte, hilabete, aste, egun, ordu eta minutuak denbora unitate berean biltzen dituena. Hamabost: segundu-hutsarterik gabeko isilaldi kalakaria. Hamabost: Koldo bezalako lagunei hamabostekoa (ama bostekoa) emateko aukera.

 Hamabosgarrenean ere gustura heldu zion erronkari; gustura heldu genion erronkari. Orain dela hogeita hamairu urteko poesiaz aritu ginen besteak beste hizketan. Nire ezerezaren eta bere betetasunaren arteko distantziaz. 

Ongi pasa genuen; batez ere ongi pasa genuen. Beste behin. 

Bidean STOP

To barrikada bat:

Aizkorritik Urbiara bidean_2014-9-17

To bigarren barrikada:

Larraitztik Aralarrera bidean_2014-9-6

Animo Irati, pasa hadi nahiahal badun! Asmazan! Ez dun matematika problema makala parean tokatu zainana. 

JOLASEAN...

Ganbora bidean

... ZUK ERE JOLASTU NAHI?

Larunbatean mendian izan ginen aita eta biok (larunbat goizak irratiari lotzen dizkiogu, baina, larunbateko lanak ostiralean egin genituenez...). Asmoa Alotzatik Ganbo Txiki eta Ganbora joatekoa zen... Asmoak, ordea, erdi asmo. Asmoei tiraka ibiltzea gustatzen zaigu, tira eta tira luzatzea, mendian batez ere. Beraz, Alotzatik Ganbo Txikira joan ginen, handik Ganbora luzatu genuen bidea, Ganbon jolasean aritu ginen eta Txindokiko puntan bukatu genuen Aralar barnebihotzzoragarriko ibilaldia.

Ganbon

Hauxe jolasa, Ganbon bertan postontzian sartzeko bertsoa idazten ari nintzela bururatu zitzaidana. Bertso egina (erdi-egina) dago. Bukaera falta zaio! Bukaera asmatuz gero liburu bat opari zuretzako! (bai, zuretzako ere bai, nahiz eta Ganbotik bueltan ez ibili. Bertso-lana Ganboko puntatik eginez gero, oparia zuretzako eta bertso-lana hortik, oraintxe zauden tokitik, ordenagailuaren aurretik, ipurdia pega-pega eginda daukazun txokotik eginez gero, oparia zuretzatko). Hor, bertso-erdi bertso-bertso hankamotza, bukaera falta duena: 

Etorri gera mendi

filma grabatzera,

barne sentimenduak

Ganbon haizatzera,

Hollywood-eko izar

handien antzera,

Alotzako alfonbra

berdean aurrera,

.............................

.............................

Txindokin

UDAN GOZATUTAKOAK_mendia

PIC BLANC (2884 m)_ 2014-7-16

Pic Blanc gainean Joxe eta biok

Buf eta baf! Laku izoztu, harkaitz urtu eta sabai (bai, gain horietan zerua sabai bihurtzen da) airezkoan soka-saltoan ibiltzea bezalakorik ez dago! 

Uztaila izozten denean uda hilezkor bihurtzen da. 

Luis eta biok. Norena da hatz punta? Ekaitz, zurea?

MONTARDO (2833 m)_2014-7-17

Montardon

Han goitik itsasoa ez, han goitik itsasoak ikusten dira. 

ia-ia BESIBERRI (3014 m)_2014-7-18

Besiberrira bidean. Oraindik ia-iarik gabe.

Bai. Ia-ia. Bai ia + ia-ia + ia = berriro itzultzeko gogoa. 100 m. Salto txiki bat. Esku luzatze bat. Zertarako? Zer da ukitu nahi dena? Sentitu nahi dena? Ikusi nahi dena? Ez dakit honek guztiak zentzurik baduen, baina, gustatu egiten zaigu... 100 m. Salto txiki bat. Esku luzatze bat. Hori guztia bagenuen. Kranpoiak falta. 

MONCORBISSON (2173 m)_2014-7-19

Zo-ra-ga-rri-a. Harkaitz arteko berdeak zerbait oso berezia du. Belar arteko harkaitzak duen bezalaxe. Artelan baten ukitu nahitaezkoa. Berdea ordea, are berdeagoa Anetoko glaziarraren islapean. 

Moncorbisson gainean

MONTGARRI_2014-7-20

Garizko mendietan behinola sortutako istorioek diote... Lau hilabeteko tartean zuria berde bihurtzen zela. Berdepeko zuriak mingaina ateratzen ziola berdeak potsikoan izaten zuen zuloari. Zuloan zintzilik pausoek euren buruaz beste egiten zutela... Garizko mendietan dena zen mendi eta ezer ez da gari; dena zen gari eta dena da mendi garizko mendietan. 

Montgarrin martxoaren 7an

Montgarrin uztailaren 20an

PERDIDO (3355 m)_2014-8-3

... eta galdu gabe ibili ginen

Gorizera bidean_2014-8-2

Sorpresa! Laino artetik, euripe-kazkabarpetik, urtetan (urtetan, urtetan, urtetan) ikusi gabeko laguna azaltzen denean... ezustekoa gozoa (gozoa, gozoa, gozoa) izaten da. 

Perdido gainean utzitako bertsoa. Txokolate zaporedun bertsoa.

Joxe, Irati eta Luis_2014-8-3


Torla, Pradera, Cola Caballo,
ttipi-ttapa, lasai, bare,
Gorizen gora ibili gara
hegazti onenen pare,
pausorik pauso Perdidon barna
dena izan dugu alde,
geure burua aurkitu dugu
bilatu beharrik gabe,
eta sentitu dugunarekin
oso-oso pozik gaude. 

Beherakoan_kontuz-kontuz

Mundiala. Mundiala mendi buelta. Mundiala sentsazioa. Eta mundiala hotza (nabari da aurpegietan, ezta?). Gauean bertan egindako elur laprast artean ukitu genuen gaina. Esperientzia zoragarria.

Beherakoan Ordesan.

URKULU-HARPEA (1423 m)_2014-8-5

Urkuluko dorrearen gainean. 

Mendiarena izaten baita

harra piztu ta hastea, 

Montardo eta Monte Perdido,

Besiberriko atea, 

Urkulu gainan estutu dugu

udako mendi katea, 

Orbaitzetatik Azpegira ta 

orain zain dugu Harpea, 

txoko hauetan bihurtu ohi da 

natura bera artea. 

Tok-tok! Nor dago zuloaz bestaldean? Iluntasun erabatekoa soineko zuriz jantzia?

AIZKORRI-ANDRAITZ (1523)_2014-8-17

Aizkorrin_2014-8-17

Ez gara aspertzen. Aizkorrira joateaz ez gara aspertzen. Aldiro erronka txikiak jartzen dizkiogu geure buruari. Oraingoan Andraitz genuen jomuga. Genuen...

Joxe, Irati eta Ekaitz_2014-8-17


Udaberrian eguzkilore,
neguan balkoi elurtsu,
udazkenean haitz distiratsu,
udan talaia amultsu,
Santispiritun gora zugana
goxo ekarri gaituzu,
paregabeko edertasunak
ezaugarritzen zaitu zu,
bihotza pozez elikatzeko,
izateko zoriontsu,
guk gutxi behar dugu baina zuk
asko ematen diguzu.

Bertsoa uzten_2014-8-17

Andraitz bai, andre haitza genuen jomuga... genuen... Ez dakit andrearen edo haitzaren bila aritu ginen... aritu... topatutakoa aurkitu gabe hausnarketarako gai hartu genituen andrea eta haitza. 

Hor nonbait_2014-8-17

RECILLA (1381 m) -CERVERA (1384 m)_2014-8-24

irri BARREAN nabari da bihurrikeria. Geldi egoten ez dakienaren kausazko kasualitatea. Bertso bildumaren koadernotxoan begira hasi eta... 2012ko abuztuaren 24an toki berean egon ginela konturatu ginen. Bi urte tartean egun beraren bueltan. Berdinak, ordea, ez ziren ez mendia eta ezta gu ere. Izan ere segundo huts baten ezberdintasunaz harago zer da bat bera eta berdina? 

Ekaitz eta biok_2014-8-24


Egunsentiko lehen printzekin 
zazpi t´erdiak aldera,
oroitzapenak hegan ekarri
gaitu Pipaon parera, 
pago itzalen azpian egin
dugu bidean aurrera,
ze ikuspegi ederrak dauden
batera eta bestera,
pauso berean lotu ditugu
Recilla eta Cervera,
bidea ikasi genuenetik 
urtero etortzen gera.

To

MUNAZORROTZ (1012m) eta SORATXIPI (1069 m)

Labaiengo apaiz gazteak semetxo bat badu...

Soratxipin.

Eta plisti... eta plasta... ametsak beratzen

Leurtzako urtegia

ITZAGA (1360 m)_2014-8-26

Eguzkia agur-agurka

Egunsentia ederra dela baina, iluntzeak ere badu bere xarma. 

Sastraka artean hanka-gorputz-mutur hotsa entzun genuen... gaua gertu genuen seinale. Natura hala esnatzen da: gu lokartzen garenean.  

Itzagan

NEURE BURUARI BARREZKA SERIO-SERIO

Irailak 1. Ikasturte berria. Jakina da irakasleok urteka ez eta ikasturteka zenbatzen (ejem, denbora bat, denbora bi, denbora hiru... segundo bat hiru senguduko?) dugula denbora. Guk ito egiten dugu urte bat bestean, edo urte bat bestearen flotagailu bihurtzen dugu, edo nola esan... urteak eskutik helduta jartzen ditugula igerian gu ito ez gaitezen: 2012-2013 eta 2013-2014 eta... bai hurrengoa ere iritsi da mahats aleak esku ahurrean (edo aurrean) jartzerako. Tan, tan, tan, tan... zorionak eta ikasturte berri on! 

Proposamen eta erronka eta helburu berriak jarri dizkiot neure buruari ikasturte berrirako. Baikorra naiz, oso baikorra, baina, nire baikortasunari barre egitea otu zait serio-serio. Irati ezetz (edo baietz, nondik begiratzen zaion)...

• Ezetz segi korrika itten (pasillotan ta astearte-osteunetan ta karreratan ta Ormaizitiko Saharan ta arbeletik arbeleako tarten ta...) (lortuko det)
• Ezetz azkazalai tira in be bi ordutik gora eon (ejem)
• Ezetz oain in pixkat (baino oso pixkat) geroxo in daikezun hue (ejem)
• Ezetz zure ahots tonue aaaaaaaaaaaaaaaaaaaaaaaaaa-tik aaaaaaaaaa-ra pasa (baten batek eskertuko izu) (lortuko det)
• Ezetz  esan ezetz bai esan daikezunen (ejem)
• Ezetz gorrittu be zure kaskezurreko kontuk kontau (lortu nahi det)
• Ezetz in literatura matematikako klasetan (lortuko det)
• Ezetz heldu beize blogen astero-astero aforismok idazteko lan ear hari  (lortuko det)
• Ezetz bukau be utzi hasitako lana (ejem)
• Ezetz Athleticen partidu bat San Mames Barrin ikustea iritsi. Baietz!
• Ezetz mendia pauso normalen juten hasi? Zer da pauso normalan kontu hoi?
• Ezetz liburuk banaka irakurri? (ejem)
• Ezetz zoriontsu izatei utzi. Ezetz!

URTE ASKOTARAKO POTTOLO!

Atzoko partez urte askotarako, Ekaitz!

Egun batean ile kizkurdun

ume bat jaio zen hara!

Gainerakoen bihotz txikitan

jo nahi zuena aldaba,

bere hitz eta sentimendutan

majiadun zerbait bada!

Hogeita hamalau urte hauetan

elkarrekin egon gara,

Ekaitz ondoan izateagatik

zoriona gurea da!

ITAKA_IÑAKI ITURAIN_2014-6-28

Hazkaka-hazkaka egiten du azalak salto, hazkaka-hazkaka lurpeko itzaletatik argiak zizta. Isiltasunaren hatz marketan oinutsik dabiltzan garrasien tatuaia da iragana, idatzi gabeko galderen bilduma erdoildua, erantzun fosilizatuen mendi-zerra. Hakaka-hazkaka dabilenak hozkaka-hozkaka egiten dio historiari haginka, aldabarik gabeko atearen bestaldean argazkiak pilatzen ari direla konturatu gabe.

Iñaki Iturain Segura Irratian_2014-6-28

Iñaki Iturain -> Euskara, arrauna, bertsolaritza, historia... herritik eta herrirako aztertzen dituen oriotarra, hezkuntza eta euskara uztartuz bide aberatsa trazatzen ari dena.

Larunbatean 1936ko gerra zibilaz aritu zitzaigun hizketan irratian, irailean argitaratuko duen liburuaz (1936ko gerraren ubera, Orioko istorioak); liburuaz, gerraren ankerkeriez, Orioz, Orioz, Orioz eta batez ere, entzundako eta jasotako istorioetan topatu dituen protagonista ataundar eta goierritarrez. Ataun eta Orio, Goierri eta itsasoa lotzen dituen Oria ibaian igerian aritu ginen.  

Hi ta ni

Txindokira bidean hi eta ni_2014-6-15

- Ta hi zein haiz?

- Ni?

- Bai, hi! Ñoño irribarre horrekin... ematen din... ematen din... hotzez-minez-beldurrez hagola...

- Hotzez ni? Eguzkia bazatorrek eta pozik nagok...

- Ez hunan minik hartuko?

- Mina? Min-gozo-plazerezkoa izatekotan. Gainotan ezin minik sentitu...

- Ez haiz ba nire beldur izango?

- Ni beldur? Non nabari duk ba?

- Irribarrean, eta belaunetan, gerria ere ez dun oso lasai jarria hanka-zangoen gainean, eta ileak... tentetzen hasiak dauzkan... Ez haiz ba nire beldur izango? Etorri hadi hona eta egin iezadan laztan. Ni hotzez nagon eta!

- Hi polita, irribarrea nirea duk, belaunak eta gerria nik neurera itsatsiak eta ileak... ileak... zer nahi duk ba egitea hezetasun honekin, zer nahi duk ba ile zapookin egitea!

- Bai, bai, baina etorri hadi niregana, hotzez nagon eta!

- Itxaron ezak! Lehenengo argazkia aterako diagu eta gero-gerokoak. Geldi egoten bahaiz laztan egingo diat, lehentxo bezala korrika hasten bahaiz hor konpon! Baina, ez diagu fundamentua egingo argazkilaria mugitzen ez baduk...

Datorren ikasturtera arte!!

Bi urtetako oroitzapenak

zuenak eta nireak,

urte askotan izango ditut

bihotz barnean gordeak, 

barre txikiak, negar malkoak,

emanaldiko loreak,

infinitura iritsi gara

elkar lotuz bektoreak,

ikasle gisa onak zarete

pertsona gisa hobeak.

Infinitura iritsi gara

elkar lotuz bektoreak,

segi margotzen matematikez

bizitzaren koloreak,

ikasle gisa onak zarete 

pertsona gisa hobeak. 

MEMORIA

Maiatzaren 14an Antsoainen izan ginen Ekaitz, Luis eta hirurok Txinparta Memoriaren elkarteak eta Arantzadi Zientzia elkarteak elkarrekin antolatutako erakusketan. Azalpen hunkigarri eta beharrezkoak eman zizkigun Koldo lagunak. "Nik ere badut aita bat"... esaldi horrekin itzuli nintzen etxera, aita hil zioten neskatila ttiki-ttiki-ttiki hark behin amona bihurtuta aitaren hezurrak besarkatu zituenean bere umetako lagunei esan ziena...

Irteeran ezin isiltasuna orri zurian kateatuta utzi eta guk ere idatzi nahi izan genituen gure sentipenak:

Antsoaingo erakusketa aretoan irteeran oharren liburuxkan idatzitakoa_2014-5-14

Maiatzaren 16an Mutilvako El Bardo Escaldaon "Al borde de cada memoria" poesia errezitaldia eskaini genien bertaratu zirenei. Koldo Plaren poemak izan genituen ezpain-esku-emozio artean.

Maiatzaren 18an, beste urtebetez, San Cristobalen izan nintzen Ekaitz, Luis, Leire, Lucia, Koldo, Lupe, Mikel, Martin, Josu, Ana Carmen, Eddy, Amaia, Guillermo, Santi, Ruben, Jordi, Felix, Paco, Lourdes... eta beste askoren artean, urtero-urtero Txinpartak antolatuta maiatzaren 22aren bueltan Ezkaba mendian egiten duten omenaldian. 1936ko biktimak, San Cristobalen preso izan zirenak... izaten ditugu gogoan. Leire lagunkuttunbihotzekogertukomaittekoadiskidearekin partekatu ditut aurtengo aurkezpen lanak.   

Entzuten ikasi nahi dut.

Ikasi nahi dut iraganaz bestaldekoa ikusten;

ukitzen

ihesean ibili zirenen pausoak,

ukitzen

paretotako marrazkiak, esaldiak, hotzikarak.

Ikasi nahi dut lotsatzen,

begietara begiratzen,

urteak zenbatzen.

Ikasi nahi dut bizitza zenbatzen,

eta kontatzen.

Lurpean esertzen ikasi nahi dut, 

sufrimendua destatuatzen,

lotzen,

sortzen.

Ikasi nahi dut izan zirenen ahotsa izaten

etorkizuneko ipuinetan...

...

...

Olerkiak botilan sartutako mezuan du jarraipena. Bakarren batek hartu zuen "nire" botila. Nik ere hartu nuen beste norbaiten botila. Etxeko sukaldean bizi da. Bai, bizi da. Norbaiten memoriak bizirik dirau botila barneko itxituran aske. Tarteka begiratzen diot. Tarteka gogoratzen naiz. Tarteka konturatu nahi izaten dut hor dagoela. 

San Cristobal Gotorlekuaren ate nagusian, Ezkaban, Iruñean_2014-5-18

Guillermori sorbaldatik helduta; etorkizunarekin iraganaz hizketan: 

https://www.flickr.com/photos/60028447@N02/14218087512/in/set-72157644329330830

Iratiren esku-hatz-horri-hizki-olerkia. Iraganari etorkizunetik idazten: 

https://www.flickr.com/photos/60028447@N02/14033758670/in/set-72157644329330830

ITAKA_Asier Lopez_2014-5-10

Asier Lopez Segura Irratian_2014-5-10

Amelingo txirulariari bateria jotzen irakatsi baliote, akaso saguek ez, akaso elefanteek egingo liokete atzetik dantza. Paristik zetorren artistak, jazza, klasikoa eta elektronika... denak nahasian-nahasian korapilatu balitu, munduak oraindik eta koloretsuagoa luke ilunabarra. Ipuinetako musikariek badakite mundua isilik dagoen bitartean, haizeak hosto artean zirri eta zarra egiten duen bitartean, lotarakoan iluntasuna entzuten duten bitartean, ipuinetako musikariek badakite beti egongo dela ipuinari kantatuko dion ahots bat. 

 

Asier Lopez -> Asier Lopezen nortasun agirian jartzen du: abestigilea; edonongoa edo inongoa. Eta punto. 

Luze jo zuen solasaldiak, oso luze; baina, elkarrekin pasatako segundo bakoitzak merezi izan zuen. Izugarri gozatu genuen. Eskerrk asko, Asier!

ITAKA_Mikel Taberna (2014-5-3)

Txipli eta txapla egiten du errekak. Egiten du salto, eta egiten du irrist. Errekak auzuneko istorioetan, busti gabeko ipuinetan egiten du irrist. Zisti eta zasta egiten du errekak. Egiten du biluztu ingurua eta egiten du belar arteko sekretuen mututasuna kontatu. Errekak emarian-emarian, korapilatutako  pausoak gordetzen ditu saskian. Begirada ibiltaria da erreka, etenik gabeko hizketaldi baten zaindari aztia.

Mikel Taberna

Mikel Taberna ->  Mendearen ilunabarrean errege eguneko panpinekin aritu zen jolasean, txokolatezko dinamitak eztanda egin eta Alkasoroko bentatik begira jarri zen arte. Kontatzeko begiratu egin behar delako, Mikelek goxo-gozo begiratzen du, goxo-gozo kontatzeko gero. 2013ko martxoan argitaratu zuen "Alkasoroko benta", bere azken eleberria. Irakurlez talde irakurle talde dabil ordutik, irakurleekin solasean, begira ikusitakoak kontatuz. Itakara hurbildu zitzaigun maiatzaren 3an Iruñean bizi den Alkaiagatarra. 

Alaizko mendi ibilaldia 2014

Pablo, Luis, Jon, Juana, Joxe, Ekaitz eta Irati

Larunbatean Etxaguen izan ginen. Sekulako giroaz, lagun arteaz, inguruaz gozatzeko aukera izan genuen. Ipurdikoren bat edo beste hartu nuen, baina, gainerakoan gozoa izan zen, oso gozoa izan zen goiza. Bukaeran ezin hutsik egin: esker oneko bertsoa antolatzaileentzat. Hantxe utzi genuen orritxoa. Unzue mendigaineko postontzian: 

Antolatzaile jardun dutenei 

bihotz-bihotzez eskerra,

txantxangorria, birigarroa,

kukua eta kilkerra,

kantu-kantari aritu dira

alaituz bide bazterra, 

Alaitz, Abrigo eta Unzue,

izan da oso ederra,

alderik alde zukutu dugu

Alaitzeko mendizerra.