ITAKA_Igor Alustiza_2016-4-30

Igor Alustiza Segura Irratian_2016-4-30

Biluzteko lotsarik ez duenak biluztu egiten du bere burua, eranzten ditu ilusioak, eranzten ditu kezka eta ametsak, eranzten du esateko duena eta batez ere gainetik kentzen du emateko duen guztia. Aurrean mikrofono bat eta kontatzeko gogoa. 

Musikari handia da Igor Alustiza beasaindarra, urte asko daramatza gitarra lagun hartuta. Hilabete batzuk atzera atera du "Ihes" diskoa. Apirilaren 30ean Itakan izan zen, Segura Irratian, solasean eta kantari. 

Igorri eskua eman eta Nikkin ezagutu genuen. Eskua estutu eta gitarra ezagutu genuen. Biluzik bukatu genuen guztiok; irria jantzi. 

Apirileko irratsaioa entzungai. Eskerrik asko, Igor!

 

IBERON MEMORIARI OMENALDIA

Azken olerkia irakurtzen_2016-6-5

Igandean Iberon izan nintzen, Zurbau parajean, Oltza Zendean. Gerra Zibilaren bueltan fusilatu zituztenen omenez ezarriko zen monolito ekitaldi-omenaldia aurkezten lagunduko ote nuen esanez pasa zidaten gonbita. Eta nik baietz, nola ez. Dakigunetik memoriaren sostengu izan behar dugula sinetsita hurbiltzen naiz aukera dudan aldiro halako ekitaldietara. Zirraragarria da bizipenak bertatik bertara ezagutzea eta oraindik zenbat lan dagoen egiteko konturatzea. Monolitoan tatuatutako esaldietako batek hala dio: "Gogoa jaso eta oroitu, hemen zer gertatu zen gogoratu eta besteei kontatu".  Bejondaiela Zurbau Elkarteari eta Oltza Zendeako Udalari ekitaldi esanguratsu, beharrezko eta eder hau antolatzeagatik! Hauxe omenaldiari amaiera emateko neure-neuretik irakurri nuen olerkia.

Non, non ezkutatzen da isiltasuna?

Norenak dira garrasiak?

Nork egin dio hozka beldurrari?

Las uñas rasgaron la tierra húmeda

y alguien depositó sus dos lágrimas en el aire. Empezó a llover.

Zergatik? Zergatik ez diozu aurrez aurre begiratzen?

Parez pare?

Begiz begi?

Zergatik ez diozu egiari desafio egiten?

En sus huesos encontró el abrazo que un día maldito le arrebataron,

en sus huesos encontró aquella sonrisa que iluminaba el valle.

Ez, EZ! Katerik gabe behar du iraganak,

memoriari askatasunez helduko diona,

hezurrak haragituko dituena, justiziaz.

Porque de aquellas uñas que rasgaban la tierra

todavía hay esperanza de que nazcan flores.

Bai, BAI! Nabari da. Gaur haize freskoa nabari da Iberon. 

Monolitoa ikusgai jarri zuteneko unea

Maiatzak 22 San Cristobalen

Ekaitz, Maite, Mikel, Irati, Martin eta Lucía maiatzaren 22an San Cristobalen

Maiatzak 22 zituen igandean. 78 aldiz hotz eta 78 aldiz busti bihurtu zen maiatzaren 22ko igande goiza San Cristobal gainean. Azken urteotan urtero inguratu izan naiz Txinparta Elkarteak maiatzaren 22aren buelta-inguruan antolatzen duen omenaldi ekitaldira. San Cristobalgo Gotorlekuko sarrera nagusiaren aurrean hitzak bertso, poesia, kantu, musika, esker-oroitzapen modura egiten dio omen memoriari. Memoriari omen modu aktiboan egin behar baitzaio, egoten jakinez, entzundakoa jasoz, jasotakoa sentituz, sentitutakoa hausnartuz eta hausnartutakoa kontatuz. Hirurogeita hemezortzi urte bete dira ihesaldi saiakeratik, 78 urte iheslarietako hiru mugaz bestaldera iritsi zirenetik, 78 urte baino gehiago garai bateko erietxea kartzela eta kartzela infernu toki bihurtu zutenetik.

Aurtengo omenaldi ekitaldira eguraldiak hotza eta bustia ekarri du. Horrela irudika dezakegu bere garaian eskenatoki krudela: hotza, bustia eta goseak zulatua.

Eguraldia modu batekoa edo bestekoa izan, omenaldiak beti izaten du, ordea, berotik eta gozotik asko. Bertan preso egon edo fusilatu zituztenen senitartekoen testigantzak zuzen-zuzenean entzutea memoriari egin diezaiokegun keinu eraginkorrenetakoa da, ustezko egiari mozorroa kentzen hasi eta egia biluztua ezagutzen hasteko modua.

Ernesto, Teodoro, Calixto eta Victorino izan ziren igandean memoriaren oihartzun kateatuak tximeleta aske bihurtu zituen izenak.

Maite Mené, Lucía Sócam eta Ekaitz Goikoetxea kantuan entzutea beti da ederra, Martin Erroren txistu hotsa entzutea zirraragarria den bezalaxe.

Memoriak hori du ederra, edo hori behar luke eder: sare bihurtzeko gaitasuna. Aurten Urretxuko lagun bat izan dut aldamenean aurkezpen lanetan: Mikel Babiano. Eskerrik asko, Mikel, jakinmina konpromiso bihurtzeagatik.

Eta ez nuke tarte hau itxi nahi orain dela hiru bat aste hil zen Txinpartako kide Jesus Mari Urbiolari muxu handi bat eman eta Txinparta Elkarteak egiten duen lana txalotu gabe. Maiatzaren 22a joan da, etorriko da hurrengoa ere; denborak ez daki, ordea, salto jauziez, memoriari askatasunez hegan egiten uztea urte osoan lan egitea baita. 

euskalerria irratirako prestaturiko irrintzia. Entzungai:  http://euskalerriairratia.eus/komunitatea/IratiGoikoetxea/1464189871315

Handitzen, handitzen

Iratiren sabela_2016-5-12

Kaixo, txiki:

Zer moduz barrualde horretan? Argirik iristen da zilborrean barrura? Argi ttikiren bat edo…

Bitxia da, baina, kanpoalde honetan dagoeneko nabaritu dugu zure argia. Zure berri kontatzen diedan guztiei irribarrezko argi bat pizten zaie begietan. Bitxia da, ia ezin sinestekoa, baina, batzuetan barruan sentitzen dut nire burua, nire baitan, zure ondoan. Eta beti egiten didazu tokia zure umetokian, nire umetokian. Bitxia da, baina, dagoeneko nahastu egiten zaizkit nire eta zure guztiak, zilbor-hestearen misterioa izango da,  ama izaten hastea kanpo eta barru guztiak lotzea, nire eta zure guztiak korapilatzea dela ulertzen hasia naiz.

Ama izaten hasi. Ama izanez hazi. Hazi. Jaio nintzenean sendagileak amari esan zion: 53 cm. Neska hau asko haziko da. Bere adineko neskarik altuenetakoa izango da. Eta 1,80ko altuera honetatik orain egunero-egunero sabela handitzen eta handitzen ikusten ari naizen honetan, esku txiki, buru txiki, bihotz txiki, gorputz txiki hori poliki-poliki nola hazten ariko ote zaizun irudikatzeak hunkitu egiten nau. Dagoeneko ari zara hazten, zure izate eta zure nortasun. Akaso zuk ere esango didazu egunen batean: ai amatxo ez dut hazi nahi…

Akaso nik ere esan nion noizbait nireari beldur niola hazteari, beldur niela ardura eta kezkei, beldur niola bizitzari barre, bizitzari mingaina ateratzen zion ume hura izaten ez jarraitzeari.

Lasai txiki, lasai maitea, bizitzako ardura eta kezka horiek baitira zorion iturri handienetakoak. Ederra hazi eta barre egiteari ez uztea da, ederra hazi eta hartutako erabakiengatik lana eta borroka egitea da, ederra zu bezalako altxorrak –eta bizitzak asko eta oso ezberdinak eskutatzen ditu- , ederra zu bezalako altxorrak aurkitzeko igeri egiten ikastea da.

Lasai txiki, hazi lasai, nire sabelak zure tamainen neurritan hazten asmatuko baitu.

Lasai txiki, hazi lasai, kanpo mundu honek ere zure tamainen neurritan hazten asmatuko baitu.

Muxu bat,

amatxo.  Zurekin batera hazten jarraitzeko irrikaz dagoen amatxo. 

ITAKA_Ipuinak kontatzen_2016-4-9

Ekaitz, Nagore, Itziar eta Imanol Segura Irratian

Bazen behin ipuin bat kalabaza batean sartu zutena. Ipuina kalabazatik atera ahal izateko hiru desio eskatu behar izan zituen Itaka uharteak. Eta halaxe elkartu ziren Segura Irratiko mahaiaren inguruan Nagore Leon, Itziar Saenz de Ojer eta Imanol Arabaolaza ipuinak kontatzera. Basoko misterioak elefantearekin eta lotsarekin nahastu eta astinaldiak kalabaza misteriotsua ireki ahal izan zuen. 

Hori guztia apirilaren 9an gertatu zen. Kalabaza irekita dago ordutik eta gauero-gauero ipuinak kontatzen dizkie ipuinetan sinesten ez duten ibiltariei. Ez dakit zergatik; guztiei begi berri bat jaiotzen zaie bekokian. 

Apirilaren 9ko Itaka saioan entzungai dituzue ipuinak (eta baita Maider Agirrek Ezkaratzetik txutxumutxuen inguruan egindako hausnarketa ederra ere). Hori bai, arretaz entzun, uneren batean belarria galtzen baduzue bekokian begi berri bat... 

Itziar, Irati eta Nagore martxoaren 18an Ordiziako Barrenan

Martxoaren 5ean ezagutu nituen Itziar eta Nagore, Ordiziako D´elikatuzen elkartu ginen hirurok Pili, Marisol eta Ekaitzekin batera. Zertara eta jolastera. Zertara eta ipuinak kontatzera. Zertara eta Ahoz aho 2016 ipuin kontaketa lehiaketan parte hartzera. Lan bikaina egiten du Intujai Teatro taldeak urtero-urtero besteak beste Ordizia eta Tolosan otsailean eta martxoan antolatzen duen hilabeteko zikloan. 

Lehenengo parte hartze honetan finalera igarotzeko zortea izan nuen (plazera da ipuin bat birritan jendaurrean kontatzeko aukera izatea) eta finalean kalabaza neureganatzekoa. Halere, eta kalabaza Iruñeako egongelan dagoen arren, kalabazaren haziak Lizartza eta Tolosan ere badaudela esango nuke, kalabaza ez baita inorena; izatekotan ipuinak kontatzen ditugun guztiona baita. 

Eskerrik asko Mai, Bea eta Alairi antolaketa honengatik guztiagatik eta aurtengo edizioan zuekin batera gozatzeko aukera izan dudan ipuin kontalari guztiei. Datorren urtean gehiago!

Ipuinak entzungai eta ikusgai Goierri Telebistan: http://www.gitb.eus/azken-berriak/8268-ahoz-aho-jaialdia-narrazio-lehiaketa?category_id=21

Hitzen Uberan egindako elkarrizketa: http://uberan.eus/?gatzetan-gordeak/elkarrizketak/item/ez-da-gauza-bera-ipuin-bat-idaztea-edo-kontatzea

Irati martxoaren 18ko ipuin kontaketan

ITAKA_Koldo Zubeldia_2016-4-2

Koldo Zubeldia

Hogeita batgarren tantoarekin txaloak jasotzen ditu pilotariak. Inork irrati bidezko txaloak merezi baditu, hori Koldo Zubeldia poeta zaldibiarra da, ekinean eginez hogeita batgarren saioa osatu baitu azken asteetan ondutako poemekin. Apirilaren 2ko saioan poemak entzuteko aukera izateaz gain, hainbat kontu ezberdinen inguruan solasean aritu ginen. Horrek aberasten du tertulia, eta patxadak eta jarioak eta esateak. Asturias eta Ibaiari begira Sariak eta gaintzurdea eta kukua eta denbora izan genituen besteak beste hizpide. Eskerrik asko, Koldo!

Ezkaratzetik Mikel Babiano aritu zen, gozo-gozo haurtzaroa hatz artera ekarriz. 

EGUZKIZ TATUATU DITUGUN PARETAK

Beasaingo pareta batean idatzita dago Ekaitzek sortutako esaldia

Ederra da ezerezetik sortzea. Ederra da sortze prozesuak bere baitan ezkutatzen duen magia. Ederra da sortu duzun zerbait eder horrek ezer ez zuen hutsune eder hori edertzea. Ederra... izan daiteke emozionantea... edo mundiala... edo kristona. Batez ere da: sentitu beharrekoa. 

Abesti sortzaileak askotan topatuko du berak sortutako abestia ezpainartean kantari darabilen norbait. Zoragarria iruditzen zait hori. 

Oraindik urtebete ez da, Beasain herriak herri gisa 400 urte betetzen zituela eta,  herriaren inguruko bideo baten grabaketa prozesuarekin hasi zirela Eñaut, Odei, Garazi eta Ekaitz. Ekaitzek kantuaren hitza sortu du, Garazik musika konposatu du, Odei irudien grabaketan zentratu da eta Eñautek dena bildu eta bideoaren ekoizpen lana egin du. Emaitza oso ederra, lau sortzaile herritar handiren arteko sarea estutu duena. Zer ederragorik!

Martxoaren 28an mendi buelta bat eman behar genuela eta hara Beasaingo pareta batean zer topatu genuen! Ez bat eta ez bi, argazkia atera genion. Ekaitzek sortutako kantu letrako bigarren bertsoaren hasiera pareta batean iltzatua-tatuatua: "eguzkiz tatuatu ditugun paretak". Nork idatzi duen ez dakigu, zerk bultzatu duen hori idaztera ez dakigu, kantua entzun eta paretan idatzi arteko denbora tartean zenbatetan izan duen esaldia kantugai ez dakigu, esaldi hori bera zergatik aukeratu duen ez dakigu, pareta hori zergatik aukeratu duen ez dakigu, beste inon beste esaldirik idatzi ote duen ez dakigu, esaldia idazteko kolore urdina zergatik aukeratu duen ez dakigu, esaldi amaierako izarra eguzkia bera izan daitekeen ez dakigu. 

Ezjakintasunak zoriontsu egiten gaitu, ez baitago sormen lan bat bizirik dagoela sentitzea baino sentipen ederragorik (biziagorik?). 

Laukote bajondeizuela egindako lanagatik! Eta zuri, ezagutzen ez zaitugun tatuatzaile horri, eskerrik asko!

BEGIRA

Orain dela bi aste bost ikasle inguratu zitzaizkidan errefuxiatuei buruzko lan bat egin behar zutela eta nire iritzi-ikuspegiaz galdezka. Zergatik ukatu, deseroso sentitu nintzen, ez gaude ohituta gai krudel honen aurrean – beste gai askoren aurrean bezalaxe – aurpegia ematera. Begiak bai, begiak guztiok jartzen ditugu telebista eta argazki morbosoen aurrean; belarria jartzea gehixeago kostatzen zaigu; baina, aurpegia, aurpegia inork gutxik ematen du. Baietz erantzun nien, nola ez, ziurtasun osoz, baietz, izango nuela solasaldia beraiekin; hausnarketarako tarte bat hartu eta iritzia beste edonorekin partekatzea beti dela aberasgarria; besteentzat batez ere, norberarentzat zer esanik  ez. 

Urteak eta urteak eta urteak daramatza gaiak gaiztotuta; egia esan, gaia bera da gaiztoa. Lehen, garai batean, ez ginen izaten mundu zabalean existitzen ziren egoera lotsagarrien jakitun; orain, nola-hala, baina, gure artera iristen den ezagutzari existentzia ezabatzen saiatzen gara.

Begira harrapatzen gaitu egunerokoak, aurpegirik eman gabe. Erromatarren garaian esklaboak hiltzen zituzten; herritarrak begira egoten ziren; txaloka asko. Inkisizio garaian elizaren agindupean sorginak eraman zituzten Logroñon epaitu eta sutara, eta herritarrak begira, txaloka asko. Zibilizazioak, gizakiak, humanoak azken urte eta hamarkadetan aurrera egin duela esango du askok, baina…

Mediterraneoa eta Egeo Itsasoa hilobi erraldoi bihurtzen ari diren honetan, Idomeniko kanpalekuan gaixotasun aspaldi desagertuak zabaltzen ari diren honetan, herritarrak, zu eta ni, bai, zu eta ni, begira gaude, interes ekonomikoak eta politikoak arrazoi, erantzule eta aitzakia bihurtuz. Bitartean, herritarrak, zu eta ni, bai zu eta ni begira gaude.

Ikasleek solasaldia mugikorrean grabatu nahi zutela eta nahi banuen bizkarrez hitz egin nezakeela esan zidaten. Ez nuen zalantzarik izan: aurpegia eman  nuen. 

Euskalerria irratiko irrintzia; martxoaren 15ekoa: 

http://euskalerriairratia.eus/komunitatea/IratiGoikoetxea/1458058778848

Burua etaedo bihotza

Letra larriz idatzitako egutegiko egunak baino bezperak eta biharamunak maite eta behar ditugula azpimarratzera mugatzen dugu sarri gure diskurtsoa. Egun bakarrera mugatu gabe urte osoan egin behar dugu lan esaten dugu askotan; sinetsi, esan eta zabaldu. Baina, asmoak diskurtso bihurtzen direnean, eta diskurtsoak publikoaren onespen, nago egutegiak egun, bezpera eta biharamunik gabe hustera kondenatzen ditugula.

Letra larriz idatziriko egutegiko egunak beti dira aberats solaserako, hausnarketarako eta eztabaidarako erabiltzen baditugu. Urte osoan horretarako astirik hartu ez (zertan pasatzen dugu denbora?) eta urteko egun batean horretarako astia hartzea ez da gutxi.

Otsailaren 14ak eskuetan bi liburu eder nituela harrapatu ninduen igandean; Miren Agur Meaberen “Kristalezko begi bat” liburua irakurtzen ari gara Beasaingo Irakurle Taldean, eta Laura Mintegiren “Sisifo maite minez” Ordiziakoan.

Maitasunaz, maite suaz, maiteminaz eta maite minaz izango dugu zer biluztua bi literatur saioetan. Maitasuna egin, eman, hartu, sentitu, agindu, eskatu bai, baina, maitasuna hizketarako gai gutxitan hartzen dugula uste dut.

Horrela hasten da Sisifo maite minez nobela: Maitasuna zer den jakin nahi duzu? Nik esango dizut zer den: estraineko presioa bularrean, eztarria ihartuta eta bihotza taupaka sentitzea; begirada galdua puntu batean tinkotzea; norberaren bizitza hiru lerroko poema batek islatzen duela ikustea; bizirik zaudela jakin eta bizi nahi ez izatea; barne-mina. Maitasuna malenkolia da, tristezia eta algara batera, pasioa, ziurtasun-eza, sugarra, karentzia eta soberakina; inoiz baino niago izan eta aldi berean norberaren buruarekiko arrotz sentitzea.

Irakurle taldekideek maitasuna nola definituko duten jakiteko desiratzen nago. Bi egun daramatzat buruari buelta eta buelta eta nola definitu asmatu ezinik nabil. Bueltak buruari ez, baina, bihotzari eman beharko zenizkioke pentsatuko du bakarren batek eta agian arrazoi du, baina, ez diot kasu handirik egingo.

Pozik nago, ezer esaten ez duten ba hori, badakin ezta, bai, motel ulertzen didak ezdeus horiez harago maite ditudan ingurukoekin maitasunaz hizketan aritzeko arrazoia eman didalako aurten San Balentin egunak. 

Euskalerria irratiko astearteko irrintzian entzungai:  

http://euskalerriairratia.eus/komunitatea/IratiGoikoetxea/1455644213927

ITAKA_Koldo Zubeldia_2016-1-23

Koldo Zubeldia

Hogeigarrena osatu genuen urtarrilaren 23an hemeretzi poemarekin. Hemeretzi poema eta hitzaurre bat. 19 + 1 = 20. Belarrira esandako sekretuekin borobildu genuen irratsaioa; eztarria motz eta sormena luze izan genuen, saiatu ginen esan gabekoak ere kontatzen. Ederra izaten da Koldo Segura Irratiko estudioan izatea, ederra solasean aritu eta poemen zorroztasunarekin (ai!) jolas egitea. Ederra izaten da elkarri beti zerbait berria esateko dugula ohartzea. Eskerrik asko, artista!

Ezkaratzetik Joxe Begiristain ataundarra aritu zen; maisulan bikaina jarri zigun mahai gainean. 

ITAKA_Maddi Noguera_2016-1-2

Maddi Noguera

Formato txikian entzun genuen, Beasaingo Liburu eta Disko azokan. Ez dakit 40-45 minutuz... parez pare, bera aurrean genuela... Eta harrapatu egin gintuen. Hori da denbora: 40 minutu. Harrapatu egin gintuen bere ahotsak, bere aurpegiak, bere begiradak, bere gitarrak... Hori delako musikak duen magia. Eta hala proposatu genion: guk gozatu dugun hau gure entzuleek gozatzea nahi genuke. Etorriko zara irratira? Berak baietz. Ahots, aurpegi, begirada eta gitarra hartuta etorri zen Maddi Noguera, ataundar musikari gaztea, irratira urte berriari zuzen-zuzenean musikaz kaixo esatera. 

ITAKA_ Isuo Sasiia eta Jon Murua_2015-12-19

Jon eta Isuo Segura Irratian

 

Elkarri marrazki bana eginda etorri ziren. Elkar aurkeztu zuten zuzenean; irratian. Elkarri begietara begira. Isuok Jon aurkeztu zuen eta Jonek Isuo. Isuok Joni buruz esan zuena: gizon orekatua, aurpegi borobil samarrekoa, betaurrekoduna, beti bizar pixka bat izaten duena, beti neurri berean. Berezitasuna: kopeteko begia, hirugarren begia, tipo espiritualaren ikur. Jonek Isuori buruz esandakoak: mutil saltaria, dantzan hasten denean pasioz salto txikiak egiten dituena, bizitzarekiko jarreraren isla. Inoiz iritsi da ilargiaz harago salto egitera. Dena ez zuen kontatu Jonek Isuori buruz (badaezpada ere). 

Gitarra eta tronpeta lagun, musika-kantura etorri zen bikotea Segura Irratiko Itaka saiora. Idiaren zaintzari buruzko hamar estanpak diskoa aurkeztera; besteak beste. Asmoa hori bazen ere, hori eta askoz gehiago eman zioten irratiari. Musika zoragarria egiten dute, berezia, patxadan, lasai-lasai, barru-barrura iristen den horietakoa. Plazera izan zen goiza eurekin partekatzea. 

Lanean ari dira bigarren diskoarekin, jarraituko diegu arrastoa. 

KARTZELARA GOAZ

Arriskua beti dago presente. Eztenak batzuetan egiten du zizt. Eta ipurdia eztenaren parean egokitzen zaizunean… izan daiteke kasualitatea, kausalitatea, patua, zoria, hala behar zuen, zerbaitegatik gertatzen dira gertatzen direnak eta niri gertatu beharra ere, gaur, orain, hemen… eta ipurdia eztenaren parean egokitzen zaizunean mina egiten du. Ez dakit eztenak edo ipurdiak. Hori bai, kaka zahar guztiak eztarrian korapilatzen dira.

Ederra joan zen larunbateko irratsaioa. Gozatu egin zenuen, Irati, eta Iñakiren hitz-jolasek bera ere gustura aritu zela helarazi zizuten. Zergatik ez aitortu: lan bikaina egin zenuen mikrofonoaren aurrean, Iñaki Zubeldiaren lan berriak merezi zuen tarte eder bat eta asmatu zenuten galde-erantzunetan.

Orain dela 46 urte idatzitako “Euskaldun bat Marten” eta argitaratu berri duen “Martetarrak Zarautzen” liburuak izan genituen hizpide. Goizeko hamarretan puntuan Audacity-ri Klik. REC. Grabatzen. Zuzen-zuzenean egindako saioak asteazken iluntzetan errepikatua eta blogean zintzilikatua izateko aukera eduki dezan.

Audacity. Arriskua beti dago presente. Eztenak batzuetan egiten du zizt. Batzuetan baino ez, ia inoiz ez. Ia salbuespen marka izan zen larunbatean. Ipurdia eztenaren parean egokitu eta kaka zahar guztiak eztarrian korapilatu zitzaizkidan. Azken minutuan Olatz Zugastiren kantu eder batekin agur esaten ari nintzela zeharka ikusi nuen ordenagailuko pantaila urdintzen, error eta reiniciar. Bi orduz saiatu nintzen irratsaioa berreskuratzen. Google-ko jarraibide ulertezinei jaramon eginez, Iñigo lankideak ia-ia lortu zuen. Baina ia kondena marka izan zen larunbatean.

Erraza izan zitekeen: gertatu da eta kitto. Baina, mina ematen dizuna eztena edo ipurdia den ez dakizunean kaka zahar guztiak eztarrian korapilatzen zaizkizu. Frustrazioa, inpotentzia, haserrea… erraza izan zitekeen: onartu eta kitto. Baina, geure burua zigortzen dugu sarri gertatzen direnak zergatik gertatzen diren ulertzen ez dugunean.

Epailea: ni

Akusatua: ni

Kausa: ordu eta erdiko sormen lan ederra galtzea

Kondena: ordu eta erdiko sormen lan ederra sortzea

Urtarrilaren 19an arratsaldeko 17:00etan Martuteneko kartzelan sartuko dut neure burua. Eta gorputza. Ordu eta erdiko sormenera kondenatu dut neure burua. Eta gorputza. Literatura kartzelan. Nirekin batera sartuko ditut Nagore Ezeiza eta Ekaitz Goikoetxea. Errugabeak dira, baina, neurekin kondenatzea erabaki dut. Tarteka gertatzen dira halakoak ere. Literatura kartzelan. Ordu eta erdiz. Sormenera kondenatuak.

Agian ausartuko naiz Audacity bidez saioa grabatzen. Hori izan daiteke askatasuna eman diezadakeen fidantza: kartzelan eskainitako literatur saioaren grabaketa. Agian ausartuko naiz Audacity bidez saioa grabatzen. 

Euskalerria irratiko atzoko irrintzian testua entzungai: 

http://euskalerriairratia.eus/komunitatea/IratiGoikoetxea/1452620952667

ITAKA_Tere Irastortza_2015-12-5

Ez zegoen hutsunerik; orratz batentzat tokia baino ez. Ez zegoen hutsunerik, norbait saiatu zen oin punta ñimiño baten keinua itzal bihurtzen. Norbait saiatu zen, baina, orratz batentzat tokia baino ez zegoen. Eta hutsunea ez da putz eginez sortzen, hutsuneak ez du ezerezik bere baitan, hutsuneak bete egiten du zuloa, eta hor orratz batentzat tokia baino ez dago. 

Hor orratz batentzat tokia baino ez dago. Muntua betetzen zenuten; hutsune eta guzti. 

Mundua betetzen zenuten olerki liburu ederra aurkeztera etorri zitzaigun Tere Irastortza abenduaren 5ean irratira. Tarte gozoa izan zen. Oso goxoa. 

Neguko oporretan gozatutakoak eta Antonio

GANBO (1413 m)_2015-12-25

Giro zoragarriarekin, inguru ederrean, konpainia bikainarekin (eskerrik asko, aita) goiza borobildu egiten da Aralarren bihotzean. Han atzean Txindoki sudur zorrotz. 

Ganboko postontziarekin

ANTONIO DE PABLO_1955-2015_2015-12-26

Gozamen uneetan halako eztenkadekin egiten dugu topo. Eta minak iraun egiten du. Institutuko egunerokoan iraun egiten du minak. Eta zuk utzitako irribarre-ahots ozen sarkor ederrak. 

Sekulako idatzi ederrak ari dira ikasleak zure omenez egiten. Plazera izan da zure lankide izanik, ikasleek bezainbeste ikastea zugandik. 

Zoriontsua egin zintuen

irakasteko jardunak,

zenbat ikasgai eman dizkigun

zure kritikotasunak,

izugarrizko indarra zuen

zure giza-nortasunak,

Ai Antonio, opari dira

zu bezalako lagunak,

ta zure faltak ekarri arren

une triste ta ilunak,

hain indartsu zen zure baitango

ahotsaren oihartzunak,

biziberritu egingo ditu 

institutuko lagunak. 

BERIAIN (1493 m)_2015-12-27

Zorionak, zure urtebetetzean zorionak... belarritik tiratzean zorionak ta muxu bat, zuretzako. Urte askotarako, Irati! 

Ez dago zorion opari ederragorik zuretzako: izugarri maite dituzun lagunekin goiz pasa eder bat egitea mendian. 

Waqar, Ekaitz, Khurram, Joxe eta Irati. Argazkilari Luis. 

AIAKO HARRIA (Erroilbide, Txurrumurru eta Irumugarrieta)_2015-12-29

Ezagutzeke, ezagutzeke... mendirik mendi ibilian ibili ondoren... azkenean... eraztun-heldulekuari eutsi eta ipurdiak gora! Han goitik ere itsasoa ikusten da. Eta nola gainera! 

Ni eta itsasoa. Tira, itsasoa eta ni.

Granitoaren ezkutaleku

historiak ekarriak,

hiru tontor gain interesgarri

lotzen ditu uztarriak,

xenda bihurri, harkaitz jolasti,

ta bista ikusgarriak,

itsaso eta mendi artean

biltzen diren mugarriak,

iraganaren aztarna bizi 

dira Aiako Harriak. 

Iñaki, Joxe, Luis eta ni. Eskerrik asko Iñaki gidari lanengatik eta...!

AGAUTZ (974 m) - SASTARRI (995 m)_2015-12-30

Zer da, zer da? Zenbat eta gehiago ezagutu, goiza orduan eta gehiago gozarazten dizuna? Agautz gaina Ataun, Lareotik gora. Bisitan datorren edozein laguni erakusteko txoko aparta. 

Joxe eta biok Agautzen. Argazkilari Pablo. 

Zer da, zer da? Zenbat eta ilunago egon ingurua burua orduan eta gehiago argitzen dizuna? Erraiak bere horretan, halaxe ezagutu genituen han barru-barru-barruan. 

Sastarriko kobaren atarian espedizioaren ondoren. Argazkilaria: barrunbeetako ...

SAN SILBESTRE ZUMARRAGA-URRETXUN_5 km eta ... _ 2015-12-31

Bikotekako lasterketa mistoa. 85 zenbakiarekin Gorka Santesteban eta Irati Goikoetxea. Eskerrik asko Gorka parte hartzera animatzeagatik eta eskerrik asko Luis; ezin entrenatzaile hoberik aurkitu. 

Aldea nabari da, ezta?

1.go itzulia:

2. itzulia:

IRIMO (901 m)_2016-1-1

Urte berri on, kuadrila! Eguneko 24 ordutan, asteko 7 egunetan eta urteko 12 hilabeteetan zorionik ederra izan dezazuen (eta zorion hori lortze bidean lan egin dezazuen) opa dizuet: 24·7·12=2016

Gaur lehertzen da urtezahar eta

urteberriaren lehia,

begiratu ze dotore eta 

eder dagoen izeia,

izango dezu argaldu edo

maitemintzeko ideia,

goizer entzun eta jarraitu

zure bihotzaren deia,

zorionaren urtea baita

bi mila ta hamaseia.

Joxe, Khurram, Waqar, Irati eta Gorka

ETXEBARRIKO HAITZAK-LARRAITZA ETA KREZMENDI URBASAN_2016-1-5

Sorginak toki sorginduetara joateko ohitura du. Zer egingo diogu!

Luis eta Irati. Argazkilari Joxe eta Pablo.

LIBURUAK GAILURREAN_IRAKURKETA GOZAMEN

Irakurri eta gozoki bihurtu ditudanak: X hil da, Mundua betetzen zenuten (bigarrenez), La buena suerte, Atertu arte itxaron, Gerezi denbora, Lasai ez da ezer gertatzen, Martetarrak Zarautzen. 

Irakurri ditudanak

 Zain ditudanak; berandu baino lehen irakurriko ditudanak: Zu eta Orain hilak ditugu. 

Zain ditudanak